Pitu na lang banuang kasal ding miasawang
Damaso at Juana, pero den metung man
Ala la pang meging bunga ning karelang
Pamiabe kilub ning bale rang santungan.
Sibukan da na ing king Obando minta
Ban tumerak dapot bigu ing pake ra
A maramdam ita ning panalangin da
King karin, kasebian, milagrosang santa.
Ing pemangawa ra mialiwa nang bage,
Ating pasalungat at ating pabakle;
Maki-tumbang presu ampo pang patalete,
Dapot eria’palto ing maging pangane.
Ing ken Sasumuan a awsan dang kuraldal
A pamagmasusi king aldo kapiestan
Na ning metung karing Santang patulunan
Ding ala pang anak, gewa ra mu naman.
Pero kalupa ning sadia e pa murin
Milamnan i Juana, nanan da deting
Tumerak, kuraldal, magpakending-kending
Libutad ning dalan, keta, keni’t karin.
Misan, uli na ning maynip ne talaga
I mister, a sabik nang mika-anak la,
Inagkat neng munta ing keyang asawa
King metung a doktor banting magkonsulta.
Malagua’t salita, sinuri nong’ ustu
Ning doktor, at ngana: “Bukas alas otsu,
Abalu yu na ing resulta nung nanu”;
At nyang magbalik la, ngana ning mediku:
“Aku bilang metung a espesyalista
E ku pa migmintis king kanakung obra,
Inya asabi kung dit’man alang duda
Adua ing malino ikit kung resulta.
Masanting ya ining metung a balita
Dapot matsura ya ngana ining kadua”;
Ing masanting ya na ing pinili ra pa…
Ngana king babai: “Dapat kang magsaya.
Mag-atlu neng bulan misis ing bugtut mu,
Basi king ‘frog test’ a maingat gewa ku ”;
Panamdam ding adua mikaul lang ustu,
At nganing mister a sobra kakusuelu:
“Nung lalaki ya yan kaku te’ palagyu
Ban kanita kaku ya mamuling lalu”;
At nganing misis a biglang miparuku:
“Nung yan ing buri mu, ikang bala rugu”.
Palual no’ king pasbul inyang magbuelta ya
I mister, at ngana: “O itang matsura,
E ye pa sinabi… nanu ya pu pala?”
“Meyakit ing ala kang mabie semilya!”
