SAMAL, Bataan — Isang pulis na bagong destino sa Balanga City, Bataan ang tinambangan habang sakay ng motorsiklo Miyerkules ng umaga ng mga hindi pa kilalang mga tao at namatay noon din sa isang sitio dito.
Ang biktima ay kinilala na si Staff Sgt. Frederick Oconer, Jr. na nadestino sa Balanga City mula sa hindi pa matiyak na lugar ilang araw pa lamang ang nakakaraan.
Panggabi umano ang duty nito sa Balanga City police station at pauwi na sa kanilang tahanan sa Barangay Sapa sa Samal nang barilin ng dalawang lalaki na sakay ng kotse na may plakang PRO 145, sabi ni Lt. Maria Jeicyl Capoquian, deputy chief ng provincial police information office.
Limang basyo ng M-16 rifle at tatlong basyo ng .45pistol ang nakuha sa lugar ng pinangyarihan ng pamamaril.
Nahandusay ang biktima na wala nang buhay sa tabi ng kanyang motorsiklo sa kalsada sa tabi ng isang high school na malapit sa mga kabahayan sa Sitio Adamson ng Barangay Gugo sa Samal.
Patuloy pa ang imbestigasyon ng pulisya na hindi titigil hanggang hindi nabibigyan ng katarungan ang pagkamatay ng biktima, sabi ng police PIO.
Sinabi ni Capoquian na labis na nabigla at nalungkot sa nangyari ang buong pulisya ng Bataan sa pangunguna ni acting police provincial director Col.Joel Tampis, na nag-utos ng mahigpit na manhunt operation para sa ikadadakip ng mga suspek.
