Aprimero de Oktubre, mil nuebe nubenta’y singku,
Iniang kabud-abud namu, dane Albugan ning sentru
Ning Pampanga, telapayong ing asuk a ikit tamu,
A bigka ning masangil a bulkan keti kekatamu;
Cabalantian ning Bacolor ya ing kitkut nang masolu
King balas a tinulandung a keni metipun ustu.
Meging pisak ing marangle a sadia nang bububuran
Karing makule nang aslag ning aldo neng kayabakan,
At ing kaugtuan na niti a sadiang kapali-kapalian
Migmistula yang antimong benging waring kapitangan;
At nu’ kambe na ning patak nitang tikatik a uran
Abu’t lahar itang dagpa king gabun a makalantang.
Agiang nu’ka anti tapang, isipan kung mina ka lub
Nung akit mu ing mabilis a paniatang na ning albug;
At ninung e mag-imate keng sobrang sindak at takut,
Ngening ing kapamilya mu akakit meng alto-lumbug
Kabang ta’ne yaniud keta nitang masalusung agus,
At e me asagip uling parehu kayung malumud?
Ding kababatingan anak at keta aplit manintun
Lipat de pa itang Sisa, a sunde-sape luluyun;
E ra balu ing daptan da at alus alang direksyun
Ing lakad da ring aliwa uling e lamipaindatun;
At kareti ing lalu kung kelunusan, ya ing metung
A matuang babaing ating bingut a pikum-kumun.
Ninu mo ping e tumangis at ngulangul king pagsalbat
Ngening detang santungan da mitambunan la’t melasak?
At nu’ anti katibe ing salu mu ban e malasak
Kabang daramdaman tamu ing gulasyo at gulisak
Ding makatua at babaing maybug maluse keng sindak
Potang akit dang mamagus itang bubusuk a burak?
Pilan lang pakakalulung memalen a mibwis a bie
At e na meyakit mu man o milibing kaya bangke?
Nu’la anti karakal ding mengatambunan a bale
King atmu kapaling lahar a kinusad king marangle?
Deti at ding aliwa pang mangasanting a pagkabie,
Sindak ketang oras a ita ing keng pusu ra memale!
At alus mamilatan mung pilan minutu ing ayun
A e mu apulung ukdung pepagalgal na ing gabun,
Inia naman indat iti sapulyut midadapitun,
Pelalung bakal a pusu ikua niting apa-ugun;
Uling pati ken e sadiang biasang maus king Miniaklung,
Kanita re aganaka at kilait susun-susun!
E la ditak ding memalen a sinintang na pagkabie
Niting bulkan a kabud na mibangun keng panga-imle;
Pilan a ektariang gabun itang karin king marangle
A bigla nang mitambunan king lahar a sinagese?
At nu’ pati damulag ding ortelanu – mengamate
A kitkut na king balas a migit pa king apulung pie?
At keta ring mirasan king sengilan ning Pinatubu
A’yantimo ring king Banlic at ding karin Tete Gugu,
Deti king mesabing lahar a mabilis mananabu,
Mikutkut lang lampas pa king walung dobling kalas salu;
Ing makalto king kolehiyo ning Don Bosco, 3rd Floor niamu,
Niang kaybat ning bagyung Mameng a peka-mas grabing lalu.
Cabalantian ning Bacolor, a digsu namu mebura
Keng mapa ning Capampangan, iti migit pa king sadia,
Keng sigla na ning komersyo at aliwa pang industria,
Ikua nang mekapibangun kaybat ning mapilan banua;
Inia oren pati timias at yumu na ning timan da
Ding memalen patune king ing bie reti tiwase na!
