LUNGSOD NG BALANGA — Batay sa huling ulat ng provincial health office Huwebes ng gabi, nagtala ang Bataan ng 12 bagong kumpirmadong kaso ng coronavirus disease at pito ang bagong nakarekober sa mapanganib na virus.
Sinabi ni Gov. Albert Garcia na dahil sa pangyayari umakyat sa 296 ang kabuuang bilang ng nagpositibo, kabilang ang 64 na aktibong kaso samantalang 221 ang mga gumaling na sa Covid-19.
Ang mga bagong kumpirmadong kaso ay apat sa Mariveles, tatlo sa Dinalupihan, dalawa sa Limay, at tig-isa sa mga bayan ng Abucay, Orion at Orani.
Ang mga ito ay isang 28-anyos na babaeng overseas Filipino worker, 36-anyos na lalaki, 55-anyos na lalaki,at 41-anyos na lalaki, lahat mula sa Mariveles; 36-anyos na babaeng health worker, 48-anyos na lalaki, at 68-anyos na babae mula sa Dinalupihan.
Ang iba pang kumpirmadong kaso ay 64-anyos na babae at 33-anyos na lalaki mula sa Limay, isang 35-anyos na lalaking OFW mula sa Abucay, 19-anyos na lalaki mula sa Orion, at 39-anyos na lalaki mula sa Orani.
Ang mga nakarekober naman ay isang 26-anyos na babae, 56-anyos na babae, 60-anyos na lalaki, 34-anyos na lalaki, at 70-anyos na babae, lahat mula sa Mariveles; 38-anyos na babae mula sa Orani, at 33-anyos na babae mula sa Pilar.
May 11 nang pumanaw sa Covid-19 sa lalawigan.
Mula 6,937 na sumailalim sa Covid-19 test ay 6,467 ang nagnegatibo na samantalang 174 ang naghihintay pa ng resulta ng pagsusuri.
