Ang RG Gas Station sa kasagsagan ng sunog.
LUNGSOD NG MABALACAT — Isa ang kumpirmadong nasaktan nang masunog ang isang gasolinahan sa Barangay Cacutud dito.
Sa report mula kay city police chief Lt. Col. Edward Guevara, isang compressor ang umano’y nag–spark na siyang pinagsimulan ng sunog sa RG Gasoline Station.
Ayon sa ulat isang nagngangalang Abraham Gantan, driver ng gas tanker na nakaparada sa may gasolinahan ang nagtamo ng sunog at lapnos sa kanyang tuhod at binti.
Mabilis na rumesponde ang mga firetruck mula sa Mabalacat City at Angeles City fire station at Dee Hwa Liong fire brigade volunteer at kaagad naming napatay ang sunog at hindi na nakapaminsala sa kalapit na mga bahay.
Nagpapatuloy pa rin ang imbestigasyon ng pamatay sunog hinggil sa nasabing insidente.
Nag-viral sa social media ang sunog na kitang-kita mula sa bahagi ng Subic-Clark-Tarlac Expressway.
