Ang basketball player na si Christian Garcia habang kausap ni Bacolor chief of police Major Louie Gonzaga. Kuha ni Rommel Ramos
BACOLOR, Pampanga — Arestado ang isang professional player ng Maharlika Pilipinas Basketball League (MPBL) at dalawa pa sa ginawang drug buy–bust operation ng mga operatiba nitong Mayo 14.
Kinilala ng Bacolor police ang main suspect na si Christian Garcia, 25, professional basketball player, at sina Medwin Pascual, 21, at si Sheila Marie Chiu, 29,kapwa residente ng Barangay Cabambangan.
Nakuha sa mga ito ang anim na piraso ng heat sealed transparent plastic sachets ng suspected marijuana leaves, tatlong units cellphone, at P500 buy–bust money.
Una sa pag-aresto sa mga ito ay sunod-sunod na pagkakahuli sa ilang mga sangkot sa ilegal na droga kayat natukoy ng Bacolor police na ang main source ng marijuana sa lugar ay si Garcia.
Ayon kay Maj. Louie Gonzaga, hepe ng Bacolor police, ang mga buyer ng suspek ay mula sa mga kalapit na bayan ng Bacolor at hanggang sa Nueva Ecija.
Nagsisisi naman ang suspect na si Garcia sa pagkakasangkot niya sa droga na hindi na daw niya ito uulitin pa at plano pa rin na ipagpatuloy ang paglalaro ng basketball.
Ang mga suspek ay kasalukuyang nakaditene sa Bacolor Police Station at nahaharap sa kasong violation of Sec 5 and 11 in relation to Sec 26, of Art. ll of RA 9165 ng Comprehensive Dangerous Drugs Act of 2002.
