OLONGAPO CITY – Patay ang suspected pusher na nasa drug watch list sa lungsod matapos umanong manlaban, habang sugatan ang isang pulis sa drug buy-bust operation sa Barangay Sta Rita ditto kahapon.
Batay sa ulat ni Police Station 5 commander Capt. Joseph Albert Gatchalian Seño kay Olongapo City police director Col. Benjamin Sembrano, nakilala ang suspek na si Cris Rodillas Bonifacerio, nasa wastong gulang, at residente sa nabanggit na lugar.
Ayon sa ulat, nakatanggap umano ng impormasyon ang mga awtoridad hinggil sa patuloy na iligal na gawain ng suspek kaya isinailalim sa surveillance, at nang magpositibo ay saka ikinasa ang buy–bust.
Nakatunog umano ang suspek na undercover police ang kanyang katransaksiyon kaya tinangka pa niyang tumakas. Nagkaroon ng habulan hanggang sa masukol ang suspek na nagawang makapagtago sa isang bahay, subalit itinuro ng mga nakakita ang kinaroonan niya kaya nakorner ng pulis.
Nakumbinsi pa umano ang suspek na sumuko, pero nang lapitan ng umaarestong pulis, bigla siyang bumunot ng baril at pinaputukan ang pulis. Nakailag ang pulis at dinamba ang suspek.
Habang nagpapambuno, nagawa umanong makabunot ng patalim ang suspek at sinasaksak sa dibdib ang pulis na napaatras, at sa pagkakataong iyon ay pinaputukan ng suspek ang sugatang pulis. Nakaganti ng putok ang pulis na agarang ikinamatay ng suspek.
Narekober sa crime scene ang tatlong maliit na pakete ng hinihinalang shabu, marked money na ginamit sa buy-bust, isang baril na revolver, at balisong na parehong ginamit ng suspek sa panlalaban.
