DELANAN ku ing bie meging baintau
At e na la ditak poesyang gewa ku,
Pero agyang metung mung pyesa aliku
Sinulat patungkul karing piglolon ku.
At agyang pikudta yamung kawatasan
Inggil king lagyu ning tune kapalsintan
Ala ku mu namang belangas metung man
A makaparikil king bage anti yan.
At nu’ disan ku ing miglyebu otsenta
E ku pa wari pin naman ken milsinta?
Pero angga mu king metung man karela,
E ke gemitanan pikudtang harana.
Angga mu king waman karen diniga ku
Kapamilatan na ning simpling amanu
At e rima-rima ampon makabersu,
Pati king babaing meging asawa ku.
Ngeni pamu, oyan king bie kung maratun
At king e asagkang datang ing panahun
Bisa ku’t e bisa, dulung ku king aun,
Intasang king diwa iti meging amun.
Ban isulat ke’iting malukang poesya
A makaparikil king dalise sinta
Para king aliwa, ining bukud pyesa,
Ngening kapilan ku maklak at mayna na.
Nung nu’ alus e ku na agyung sumulat
‘Love letter’ karin ku milsintang mataktak
King Mayupayang Dios a muna kung dapat
Luguran, dakayan pamalsintang wagas.
Keka, o Guinu ku, a linalang kaku
Ban mipmung kababan manyad pakalulu,
At e potang dening gamat at bitis ku
Pante na la… awsan daka’t manigapu.
Ipaganaka Me ing tamak a dalan
Ban e ku malili a kakung baltangan
Papunta king Kekang malagung karinan,
Nung nu’ pin ing sabla pawang kabanalan.
Potang buri mu nang lubus baywan kaku
Ing makaba-kabang bie a peparam mu,
Patudturan mu kung manyaman, Ginu ku
Penandit mu, atyu na ku keng siping Mu!
E ku na buri pa ing magkakasakit
King dase mirate, inya anggang binit
Magparalampu kung Keka adwan pilit
Kwanan Mu ku potang ing tudtud, alimit.
Ban keta pati na ring kakung kapamilya
E na’la kanaku magkakasakit pa
A manyese ngening ing isip lipang na
At e na lwat, Ginu marap na ku Keka.
Ibie mu kanaku ing kapatawaran
Kabang ing lagyu Mu agyu ke pang awsan;
At e potang payus na ku’t e maramdam
Ing adwan kung ganap a kapatawaran!
Amen…
