KING kakung sariling timalad, e na lwat
Datang e mikabla, ing king Santong Sulat
Ababasa tamung mangalino ulat,
Yan mamit-amit nang posibling marapat.
Antining ding tanda ning tipa yang miuman
Ing Anak na ning Dios ibat king katasan
Ban ukuman iting yatung pagkarinan,
Malapit na’t alus mayayakit na ngan.
At karen metung ya itang ngara kabud
Ganap nang merimla ing dalise lugud
Ning tau king kapara nang tau, metbud:
Mapilit neng kuldas ing Banal a Tubud.
Ing Ayun, Bagyu at grabing kalamidad
A dagpa nu’pa mang balayan at siyudad
Mabilug a yatu, anti nang banayad
Paramdam ing hula – ume nang matupad.
At ding bansa potang king metung at metung
Ala na la namang pamisasanmetung,
A parasan nune pansariling namung
Interes – kyan na la ren mitatambubung!
At nung nu’ ing pihung kamaulyan niti
King insa’ mang panig, anti’ing malilyari
Ken king Iraq, Iran at aliwang parti
Ning Sentrung Aslagan king panahun a’yti.
Nung nu’ pati na ing U.S. makisoso,
Inya mapalyaring yan mipataloto,
Sakali’t interes ning pekamasaklo
Mata, ing kareti ganap mangibabo.
At gyera mundial ing ipahiwatig na
Ning anti yan agpang king Banal a Biblia,
Inya nanu’t e tamu talanga banwa
Ban adwan king Ginu ing e ta’ miyawa?
Uli ning kabud den ilang mitandikan
At milablab ustu ing api ning laban,
E mu ila ring ken ing mamin magisan
Nune pin itamu midame mu naman.
Obat ali? Potang labu-labu na la
Ding mikampi-kampi, laban e kasangga
(Ning U.S. ila ning tusong North Korea),
Kanita na sulak ing mapaling gyera.
At ding inimbentu rang mialiwang armas,
A e na anti ing kanitang milabas,
Ing ibunga reti, atin pang miligtas
Potang ing ‘3rd World War’ ya na ken ing matdas?
Uling ning nanan ta’mang pakasalikut
King sidwan ding pekamatarik a bunduk
E ta’mu alisyan ing bagsik ning asuk
Ding nuclear bomb’ dang sari kasikan manduluk.
Atin pang mitagan a mabie king yatu
Nung anti kanyan a karasan ing gulu?
Ala na, ala na! Pelalung insektu,
Mate at marunut, muli ngan king abu!
