THANKS a lot, dakal a dakal a salamat
king mapuri’t de kalibring talasulat,
(Cesar ‘Bong’ Z. Lacson,) inggil kening biklat
nang isyung kanita pa mituklip dapat
Dapot e mirinan pansin ing maulang
bage minuli king alang kapanayan
uli namu mekad ning e ku talagang
liping Fernandino inia mibasket yan.
Pero anti na ning yan miuman mibuklat
a nung ninung tune king Himno sinulat
ning ngeni metung nang asensadung siyudad,
asabi kung matni ing akung melangkas.
Ing tutu na niti ala kung intensyun
ipakarine ke’ing meging kumpare kung
Geronimo, nun’e babie ku ing kakung
panig, king mali na niting aksasyun.
A ngana buri kia kanung pakisiran,
agpang king sulat na a keyang pepabal
king kanita kuenta Konsehal pa bilang
Jimmy T. Lazatin na ning Sanggunian.
E kanaku ibat ing aliwa pin ya
ing king lyrics niti sinulat talaga,
nun’e composer ya namang kalupa na
ing king Sanggunian sinulat kanita.
E mu i Jaspe Dula ken ing makibalu
ing king lyrics aku ing talagang tutu
a makapelam at pati i Frank Guinto,
Doy Higante at Pol, yan lubus dang balu.
Metung ya mu karing alus e mabilang
a kanakung pyesa at/o kawatasan
ing lyrics ning Himno paksang pisasabian
nanu’t keya e ke pa apagkalub yan?
Mupin ing e ustu, aku pa ing ngeni
lalto marok karing pamilya na pati,
uling mekad e na mu naman sinabi
karela, ing kaku pepasulat nia’yti.
Inia para nganang Mr. Del Rosario,
ya pakisiran ke’t buring kung ipalto
ing aku’ing lyricist, yan asna kalino
kabaligtaran ning dapat mangibabo.
Ing akaminan ku ing metung a bage
a e kaku e ku atanggap kening bie
uling masakit ing mipapakarine
king anti kaniti nu’ta man yan ike!
AT ULI ning atiyu karin Amerika
i Del Rosario niang mirungut kanita,
inawad ding anak na panayan mi’ya
ban nang apaglualu kanu’ing sarili na.
(Pero pilan nia’tang ukdung migbakasyun
misan man e ya mekikit king city hall,
inia mangaintulid ala yang intensyun
malinawan na ing bilalag nang Nucum).
Inia anti na ning iti pasibayung
mekalkal king uli nang Mr. Bong Lacson
ba’nang maresolba, dapat ing city hall
king bage mesabi ya’nang gawang aksyon.
Kabang parehu keng mabie Del Rosario,
ala nang muna king yan masuring ustu
basi karing keya’t kakung dokumentu,
a magpatutu king metudtud a isyu.
(Atin yang kasuglung)
