POTANG ala na ku,
at keta ing katri ming Ima yu ya’nang
kilub ning kuartu mi,
kabungad king pasbul ing muna yung dasan;
Buran yu king isip
ing atiu na ke king aliwang karinan,
nun’e ikeng adua
mig-‘shopping’ kami mu o ating pintalan
ban keta e takut
o kanlap lungub king sadia ming tudturan
ing salaksak indat
aganaka ye’yting luban at linisan.
At ban e mu naman
pamangulila king kekaming panlako
itang mitanam a
tanda ning parehu na ke palang meko;
Papanatilian yung
mabie karing pusu ing tulang maglapo
at dalise lugud
a kekayu dilig mi lub ning aldo-aldo,
ngening ikeng Ima
kasakmal na kaming gabun a melaso
at e mi pa balu
nung ding kaladua mi miyukiat la babo.
Sana nung atin mang
e pamikaintindi ning metung at metung
a pepasari ra
ding masalakata king dalan luluyun;
E kayu sasali
king ititinda rang kamandag at lasun
ban ing imbut deti
muli mu king ala at e mibalayun;
Misan deng aliwa,
uli na ning diria – ing maratun-datun
a bili keng bie na
pakisiran de at atdanan pagmalun.
E yu sa’pabusten
malasak at muli mu king alang kuenta
ing matibe aptas
a bibu ming Ima para king pamilia;
Nung ating sigalut
o nanu mang bage ipaginakit na
ning kekong kapatad,
kang wali, kang atsi, o kaya kang koya,
mamilatan kayu,
at e nung kaninu ibie ing parsala
ban alang sumukal
a lub – ing atin kang penigan karela!
Sakali’t atin kung
akalakuanan a maulagang bage
a e meresolba,
melarin at e ku ikuang asalese;
Ikayu na sana
a kakung kelukup king matua ta’ng bale
ing bala kaniti,
kabang ing kapatad yung peka-pangane
atiu lipat dagat,
at ating sarili nang pibale-bale;
King likuan ming Ima,
yang kekayu munie karampatan dake.
Antining bistaman
kaku at kang Ima yu makalagyu ngan
ing titulung gabun,
at ‘Deed of Sale’ na ning aliwang pibandian,
pero uli na ning
pera na lang Ate ding piniali kanian,
ya ing makibandi
lalto king agia mang alang kasulatan;
At ikong wali na
anti murin naman ing mangaintuliran
antining ala yang
sariling anak a maliaring pamanan!
