Labuad kung palsintan, O Kapampangan ku
mekeni saguli, lukluk ka siping ku;
kilatisan ta la dening kandidatu
nung ninu karela ing sukat ibotu;
pakiramdaman to king pamangamanu
nung atin lang lugud king balayan tamu.
Yang taung malugud king indung balyan na
atin yang masabal king keyang kultura;
uling yan yang tatak ning pangabubu na
ning metung a lahi, ning metung a bansa;
nung ing kulturang yan mate at mapda ya
ing lahing mibubu mapda yang kambe na.
Kalupa na namu ning amanung sisuan
kultura yang mana king indung ibatan;
kabud yan yang mete, mete ne mu naman
ing metung a lahi, lahing kapampangan;
inya yang malugud king labuad nang tibuan
sariling kultura luguran nya naman.
Dapot, lon mu naman, balen kung mal dili
ining mararapat king panaun ngeni
karing kandidatu dakal lang sasabi
king kaluguran de ing labuad tang iti,
dapot nung igkas de ining lugud ayni
yang daramdaman mu ing banyagang sabi.
Ngaku pin: “nung tin kang lugud king balen mu
dapat luguran me ing keyang amanu;
nung kapampangan la dening kasabi mu
kapampangan sana ing gagamitan mu
mamanagalug kang bala mu nung ninu
kapampangan no man ding aduan mu botu.”
Balen ko, lawan mo dening karatula
nung nanung amanu ing gagamitan da;
ot balamu ata kakandidatu la
karin king Menila at king Amerika;
Ngaku mong sasabi: Mangapampangan ka—
kapampangan la ding mangibotu keka.
Ken pamung amanu tambing neng mabalu
nung ninu ta karen ing guintu o tangsu;
kase nung nanu ing manibat king pusu
ya ing masaglawe ketang e mu balu
anti na mo kanyan lalto ne ing tutu
nung ninu ing tune karing balatkayu.
Nganapin manyabi ning Banal a Biblya
ing lulub king asbuk, aliwa ya, ngana,
itang makarinat, nune ing palwal na
ning asbuk yang tutung makarinat ita;
inya o balen ko makiramdam kata
nung nanung amanung lulwal keng asbuk da.
Deng pane mag-english, ing aingan da den
ya ing Amerika, paninap dang Eden,
nung ing Kapampangan ya ing mal dang balen
ing kayang kultura marapat deng sesen;
ban ing amanu ra ding keyang memalen
king kapilan paman e ya mipaburen.
Deng daramdaman yung tagalog salita
ing ayingan da ren ya pin ing Menila;
alayu karela ing talagang tanda
na ning kapampangan king pusu at diwa;
nung tingiran tamu lubus mabitasa
balatkayu la mung biasang mamikatsa.
Nung keng pelikula biasa lang mag-arti
makabalatkayung sapak koloreti;
Balen kung palsintan, tingiran to reti
e ka ta paylilung paisira diskarti;
nung nanu ing tutu, dulapan te iti
e ya pelikula ing halalan ayti.
Malapit ne naman aldo pamagbotu
pakasuryan tala dening kandidatu;
ing tune malugud king balayan tamu
yang karapat-dapat a pilinan tamu,
at abalu taya nung ninu ya’t nanu
kapamilatan ding gagkas nang amanu.
Balen kung palsintan, oini ing saguli
nung nu ing katutuan ya na ing mag-ari;
uling ing pusu ra ding mapagkunwari
matangal yang anting linto pinenari
e ra no pangara kislap deng salapi
ing pluma ning watas e ya pamisali.
Mako na ku pa mu, keka lalakuan ku
ing mayap a aldo, sintang balayan ku;
kening bangkung ini, aku magbalik ku
at agkatan dakang lukluk pasibayu,
ban pisabian tala at suryan nung ninu
ding karapatdapat king kekatang botu….
mekeni saguli, lukluk ka siping ku;
kilatisan ta la dening kandidatu
nung ninu karela ing sukat ibotu;
pakiramdaman to king pamangamanu
nung atin lang lugud king balayan tamu.
Yang taung malugud king indung balyan na
atin yang masabal king keyang kultura;
uling yan yang tatak ning pangabubu na
ning metung a lahi, ning metung a bansa;
nung ing kulturang yan mate at mapda ya
ing lahing mibubu mapda yang kambe na.
Kalupa na namu ning amanung sisuan
kultura yang mana king indung ibatan;
kabud yan yang mete, mete ne mu naman
ing metung a lahi, lahing kapampangan;
inya yang malugud king labuad nang tibuan
sariling kultura luguran nya naman.
Dapot, lon mu naman, balen kung mal dili
ining mararapat king panaun ngeni
karing kandidatu dakal lang sasabi
king kaluguran de ing labuad tang iti,
dapot nung igkas de ining lugud ayni
yang daramdaman mu ing banyagang sabi.
Ngaku pin: “nung tin kang lugud king balen mu
dapat luguran me ing keyang amanu;
nung kapampangan la dening kasabi mu
kapampangan sana ing gagamitan mu
mamanagalug kang bala mu nung ninu
kapampangan no man ding aduan mu botu.”
Balen ko, lawan mo dening karatula
nung nanung amanu ing gagamitan da;
ot balamu ata kakandidatu la
karin king Menila at king Amerika;
Ngaku mong sasabi: Mangapampangan ka—
kapampangan la ding mangibotu keka.
Ken pamung amanu tambing neng mabalu
nung ninu ta karen ing guintu o tangsu;
kase nung nanu ing manibat king pusu
ya ing masaglawe ketang e mu balu
anti na mo kanyan lalto ne ing tutu
nung ninu ing tune karing balatkayu.
Nganapin manyabi ning Banal a Biblya
ing lulub king asbuk, aliwa ya, ngana,
itang makarinat, nune ing palwal na
ning asbuk yang tutung makarinat ita;
inya o balen ko makiramdam kata
nung nanung amanung lulwal keng asbuk da.
Deng pane mag-english, ing aingan da den
ya ing Amerika, paninap dang Eden,
nung ing Kapampangan ya ing mal dang balen
ing kayang kultura marapat deng sesen;
ban ing amanu ra ding keyang memalen
king kapilan paman e ya mipaburen.
Deng daramdaman yung tagalog salita
ing ayingan da ren ya pin ing Menila;
alayu karela ing talagang tanda
na ning kapampangan king pusu at diwa;
nung tingiran tamu lubus mabitasa
balatkayu la mung biasang mamikatsa.
Nung keng pelikula biasa lang mag-arti
makabalatkayung sapak koloreti;
Balen kung palsintan, tingiran to reti
e ka ta paylilung paisira diskarti;
nung nanu ing tutu, dulapan te iti
e ya pelikula ing halalan ayti.
Malapit ne naman aldo pamagbotu
pakasuryan tala dening kandidatu;
ing tune malugud king balayan tamu
yang karapat-dapat a pilinan tamu,
at abalu taya nung ninu ya’t nanu
kapamilatan ding gagkas nang amanu.
Balen kung palsintan, oini ing saguli
nung nu ing katutuan ya na ing mag-ari;
uling ing pusu ra ding mapagkunwari
matangal yang anting linto pinenari
e ra no pangara kislap deng salapi
ing pluma ning watas e ya pamisali.
Mako na ku pa mu, keka lalakuan ku
ing mayap a aldo, sintang balayan ku;
kening bangkung ini, aku magbalik ku
at agkatan dakang lukluk pasibayu,
ban pisabian tala at suryan nung ninu
ding karapatdapat king kekatang botu….
