Bengi na ning Dios pu, Amung, sana pu dasnan na cayu
king masanting a cabilian ning sulat a tiburan cu,
uli caseng macalawut ing lugal a tucnangan cu
inya sinulat na cu mu ban acasabi ra cayu,
buri da co sanang cutnan, nung iti, pamayapan yu
tungcul king nung nanung panig ing catatalacaran yu:
Macapanig cayu caya king amanung sisuan tamu
O ilang papanigan yu dening banyagang amanu?
Misan pu, penusigan ke ing Capatad king agcat na
linub cu king pisamban yu, agyang e cu palasimba,
mekiramdam cung taimtim ketang binye yung “homilia”
antimurin caring dalit ding kecong talapagcanta,
manibatan king panlub cu anggang meyari ing misa
bitasang e ke pu dimdam ing amanu tamung mana,
inya bala-balikid cung anting waring maglili na
itang balamu ala cu king labuad na ning Pampanga.
Ing Pampanga, bala cu mo, metunggue yang lalawigan
a maki sariling sabi….ing amanung Capampangan,
ngeni, nung Capampangan ya ing amanu ning balayan
o’bat neng magmisa cayu e co pu mangapampangan…?
At ing manong na pa, Amung, calwal yu king pipagmisan
at gamatan yo ding taung lulual king pasbul pisamban,
cabang pakisabian yu la canacu pung awumasdan
cabiasnan yung magsalita king amanu na ning Tibuan.
Capampangan cayu pala king kecong pamagsalita
at Capampampangan la naman ding pesitagun a malda,
inya e cu aintindyan, nanu ing sangcan na caya
o;bat pu magmisa cayu king salita ring banyaga…?
Maglalawe cayu, Amung, akit yung atmu casala
ding memalen ning Pampanga, Capampangan la salita,
balu yu nang ala cayu America at Menila
o’bat managalug cayu, at mag-english alang patna ?
E ra co tuturu, Amung, mas biasa co pu canacu
pangaras keng pamanaral king amanu na ning Guinu,
dapot suryan yu pu, Amung, lon yu naman nung e ustu
Capampangan la pu, Amung, dening taung aralan yu,
e mo caya mas lalu yang matanggap ing ebanghelyu
nung iti daramdaman de king sarili dang amanu?
mecad, icayu man, Amung, uling Capampangan cayu
mas masanting cong manaral king salitang kegisnan yu.
Cutnan da cayu pu, Amung, nucarin ya pu keng Biblia
king salita yang banyaga ing gamitan yu keng misa?
Lon yong pasibayu, Amung, ding utus ding kecong Papa
atin pu waring macanian caring batas a lelang da ?
Ala pu. Uling nung atin alang salang salangsang ya
king Dios Espirito Santo…Ita pung Aping tinipa,
uling caretang dila ding Apostoles yang kena na
ing sarili dang amanu ding memalen a puntan da.
Case king matulid, Amung, ding tiburan ning Dios mismu
inyang deti manaral la keting mabilug a yatu,
nung nanu ya ing amanung sisuan ding disnan dang tau
yang amanung ginamit dang menaral king Ebangjelyu,
yan, Amung, e macalingad, icayu mismu balu yu
macanian yang linaganap ing doctrinang Cristianismu,
ngening icayu pu, Amung, banyaga cong mangamanu
matula ya caya canyan ing Dios Espiritu Santu?
Pasibayu, lawan ye pu ing macasulat king Biblia
tungcul king capakibatan da ring talapanaral Na,
masasabing ing e tuclu caring utus a binie na
iguit yang lalung mabayat ing parikil nang parusa,
icayu mecad balu yu king mabilis ing atul na
caring Caya e memintu, Ari ya man o Propeta,
nanupata, ing e tupad, lalu’t pari yang magmisa
mabayat ya pakibatan caring gamat nang Jehovah.
Nanung milyari cang Moises? Lon ye ing Banal a libru….
Y Jehovah inutus neng pakisabian ne ing batu,
Nanu tang guewa nang Moises? E ya ginamit AMANU—
king amanung pagamit na a salita ra ding tau—
Tucud ya ing ginamit na…! Ing tucud ya ing simbulu
na ning banyagang salitang e na pagamit ning Guinu;
Nanung parusa cang Moises kening e na pamamintu…?
Pakibatan ye pu, Amung, mas balu ye kesa cacu.
Tutu pu, linwal ing danum ketang Batung berugan na
at malda la pin ding minum a mipasno king cau ra;
dapot numan anti niaman ing danum a ininum da
danum ya ring pepalto ning TUCUD ning pamicasala;
macanian mu naman, Amung king pamagsilbi yu Caya
agyang maniaman yang danum ing kecayung pamagmisa
nung e na co man manyabi king amanung pagamit na
TUCUD ya ing babarug yu…salang co king caburian Na.
Ing pakiduang na ning Guinu, CAPAMINTWAN…CAPAMINTWAN
manibat pa king minuna…. cang nunung Eva at Adan,
Y Abraham memintu ya misaplala ya cabilyan
Y Saul a e memintu, kebatingan yang cayarian;
Y Noah, pemintuan na ya, e melumud king danuman
Y Jonas e ya memintu, pepayacmul ne king asan
pablasang king pamamintu atyu ya ken ing canuanan
at ketang e pamamintu atyu ya ing caparusan.
Angga ne pa keni, Amung, ing sulat cung makibasa
lalacwan cu pu kecayu ing lugud at panalala,
caring daratang pang aldo, nung ing Guinu itulut na,
pasibayu cu pung datang king probinsya ning Pampanga;
misan pa, panikwanan cung tumagun king kecong misa
pangadian ke ing “Ibpa mi” king amanung pagamit Na,
at ngacung mangapampangan: Ing cayarian mu datang Ya
MIPAMINTUAN CA CABURYAN keti sulip, anti banua.
king masanting a cabilian ning sulat a tiburan cu,
uli caseng macalawut ing lugal a tucnangan cu
inya sinulat na cu mu ban acasabi ra cayu,
buri da co sanang cutnan, nung iti, pamayapan yu
tungcul king nung nanung panig ing catatalacaran yu:
Macapanig cayu caya king amanung sisuan tamu
O ilang papanigan yu dening banyagang amanu?
Misan pu, penusigan ke ing Capatad king agcat na
linub cu king pisamban yu, agyang e cu palasimba,
mekiramdam cung taimtim ketang binye yung “homilia”
antimurin caring dalit ding kecong talapagcanta,
manibatan king panlub cu anggang meyari ing misa
bitasang e ke pu dimdam ing amanu tamung mana,
inya bala-balikid cung anting waring maglili na
itang balamu ala cu king labuad na ning Pampanga.
Ing Pampanga, bala cu mo, metunggue yang lalawigan
a maki sariling sabi….ing amanung Capampangan,
ngeni, nung Capampangan ya ing amanu ning balayan
o’bat neng magmisa cayu e co pu mangapampangan…?
At ing manong na pa, Amung, calwal yu king pipagmisan
at gamatan yo ding taung lulual king pasbul pisamban,
cabang pakisabian yu la canacu pung awumasdan
cabiasnan yung magsalita king amanu na ning Tibuan.
Capampangan cayu pala king kecong pamagsalita
at Capampampangan la naman ding pesitagun a malda,
inya e cu aintindyan, nanu ing sangcan na caya
o;bat pu magmisa cayu king salita ring banyaga…?
Maglalawe cayu, Amung, akit yung atmu casala
ding memalen ning Pampanga, Capampangan la salita,
balu yu nang ala cayu America at Menila
o’bat managalug cayu, at mag-english alang patna ?
E ra co tuturu, Amung, mas biasa co pu canacu
pangaras keng pamanaral king amanu na ning Guinu,
dapot suryan yu pu, Amung, lon yu naman nung e ustu
Capampangan la pu, Amung, dening taung aralan yu,
e mo caya mas lalu yang matanggap ing ebanghelyu
nung iti daramdaman de king sarili dang amanu?
mecad, icayu man, Amung, uling Capampangan cayu
mas masanting cong manaral king salitang kegisnan yu.
Cutnan da cayu pu, Amung, nucarin ya pu keng Biblia
king salita yang banyaga ing gamitan yu keng misa?
Lon yong pasibayu, Amung, ding utus ding kecong Papa
atin pu waring macanian caring batas a lelang da ?
Ala pu. Uling nung atin alang salang salangsang ya
king Dios Espirito Santo…Ita pung Aping tinipa,
uling caretang dila ding Apostoles yang kena na
ing sarili dang amanu ding memalen a puntan da.
Case king matulid, Amung, ding tiburan ning Dios mismu
inyang deti manaral la keting mabilug a yatu,
nung nanu ya ing amanung sisuan ding disnan dang tau
yang amanung ginamit dang menaral king Ebangjelyu,
yan, Amung, e macalingad, icayu mismu balu yu
macanian yang linaganap ing doctrinang Cristianismu,
ngening icayu pu, Amung, banyaga cong mangamanu
matula ya caya canyan ing Dios Espiritu Santu?
Pasibayu, lawan ye pu ing macasulat king Biblia
tungcul king capakibatan da ring talapanaral Na,
masasabing ing e tuclu caring utus a binie na
iguit yang lalung mabayat ing parikil nang parusa,
icayu mecad balu yu king mabilis ing atul na
caring Caya e memintu, Ari ya man o Propeta,
nanupata, ing e tupad, lalu’t pari yang magmisa
mabayat ya pakibatan caring gamat nang Jehovah.
Nanung milyari cang Moises? Lon ye ing Banal a libru….
Y Jehovah inutus neng pakisabian ne ing batu,
Nanu tang guewa nang Moises? E ya ginamit AMANU—
king amanung pagamit na a salita ra ding tau—
Tucud ya ing ginamit na…! Ing tucud ya ing simbulu
na ning banyagang salitang e na pagamit ning Guinu;
Nanung parusa cang Moises kening e na pamamintu…?
Pakibatan ye pu, Amung, mas balu ye kesa cacu.
Tutu pu, linwal ing danum ketang Batung berugan na
at malda la pin ding minum a mipasno king cau ra;
dapot numan anti niaman ing danum a ininum da
danum ya ring pepalto ning TUCUD ning pamicasala;
macanian mu naman, Amung king pamagsilbi yu Caya
agyang maniaman yang danum ing kecayung pamagmisa
nung e na co man manyabi king amanung pagamit na
TUCUD ya ing babarug yu…salang co king caburian Na.
Ing pakiduang na ning Guinu, CAPAMINTWAN…CAPAMINTWAN
manibat pa king minuna…. cang nunung Eva at Adan,
Y Abraham memintu ya misaplala ya cabilyan
Y Saul a e memintu, kebatingan yang cayarian;
Y Noah, pemintuan na ya, e melumud king danuman
Y Jonas e ya memintu, pepayacmul ne king asan
pablasang king pamamintu atyu ya ken ing canuanan
at ketang e pamamintu atyu ya ing caparusan.
Angga ne pa keni, Amung, ing sulat cung makibasa
lalacwan cu pu kecayu ing lugud at panalala,
caring daratang pang aldo, nung ing Guinu itulut na,
pasibayu cu pung datang king probinsya ning Pampanga;
misan pa, panikwanan cung tumagun king kecong misa
pangadian ke ing “Ibpa mi” king amanung pagamit Na,
at ngacung mangapampangan: Ing cayarian mu datang Ya
MIPAMINTUAN CA CABURYAN keti sulip, anti banua.
