LUNGSOD NG CABANATUAN — Anim na suspek sa pangho-holdap sa isang convenience store sa Barangay Pambuan, Gapan City ang nasakote ng mga operatiba ng Nueva Ecija Police Provincial Office sa Barangay San Andres, Alaminos, Laguna bandang alas-3 ng umaga nitong Nov. 11.
Nasa edad 19 anyos hanggang 24 anyos umano ang mga suspek.
Sa imbestigasyon, bandang 9:30 ng gabi noong Nov. 10, nang pasukin ng limang kalalakihan ang convenience store. Pinagbantaan at iginapos umano ang dalawang babaeng kahera sa stockroom bago tinangay ang mga cash, mobile phones at hindi binanggit na halaga ng GCash funds.
Tumakas ang mga suspek sakay ng isang puting Toyota Hi-Ace van, ayon sa pulisya.
“Through joint efforts, sustained investigation, intelligence gathering, and inter-unit coordination, the six suspects were successfully apprehended by personnel of Regional Special Operations Group, Regional Intelligence Division 3, Gapan CPS, Division Intelligence, Regional Intelligence Division 4A, Alaminos MPS, Laguna PPO, and Sto. Tomas CPS, Batangas PPO,” ayon sa NEPPO.
Nasamsam umano mula sa mga suspek ang apat na granada, isang .45 pistol na kargado ng walong bala, isang .45 na laruang baril, isang .9mm pistol at hindi kaagad natukoy na halaga ng cash.
Nakuha rin mula sa kanila ang isang Toyota Hi-ace van na may license plate No. NLJ 9465, pitong mobile phones, iba’t ibang SIM at prepaid cards, isang wig, at isang plaka ng sasakyan na may numerong AIA 2366, ayon sa ulat ng NEPPO.
Ang mga suspek at nasamsam na ebidensiya ay nasa kustodiya ngayon ng Gapan City Police Station at nahaharap sa mga kasong robbery, paglabag sa RA 10591 (Comprehensive Firearms and Ammunition Regulation Act) at RA 9516 (Illegal Possession of Explosives).
“This successful operation demonstrates the importance of intelligence-driven policing and strong inter-unit coordination in bringing criminal offenders to justice. I commend all operating units for their swift and coordinated response. I urge our personnel to remain proactive and committed to protecting the lives and properties of every Novo Ecijano and ensuring a safe and peaceful community,” pahayag ni Nueva Ecija police director Col. Richie Claravall.
