maasuk a sulu, keni ku mamasa,
ban milub ing belwan, karas king eskwela,
makinini ke bie, metung mung maluka,
malaut ing bale, kuryente ala pa.
kilub na ning kwartu, t’yu ku king sikoti,
mayna kung mabiasa, karin da binili,
mitas ku mang gamat, marakal pa ing mali,
manibat kanita, dine ku migpirmi.
pilan namung bulan, magyari ng ‘grade six’,
pangarap kung galal, mebura ting gulis,
maybug ng e datang, pengaring aisip,
pagmaragul da ku, bat ning pamag-tiis.
tinuklu kung ‘high school’, bitbit ing paninap,
kanaku sa pa ‘check’, ‘test papers’ king palad,
bayu pa malyari, dapat magsumikap,
manigaral ustu, ‘lang sayang a oras.
‘bat pamagsulit, melakwan kung dili,
deng kakung kaklasi, mebating, minuli,
‘test paper’ ku ebut, ning ‘teacher-chemistry’,
besan pasibayu, pakibat ‘lang mali.
dakal lang ‘test papers’, milapag king mesa,
lawen lawen tunggal, samasnang mamasa,
e buring mawala, binie ng tiwala,
nung pagsubuk ya man, dapat pang matula.
manibat kanita, meragul kompiansa,
lawe da kanaku, metung kung biasa,
king elementarya, digsu ‘lang diploma,
pamag-graduate ngeni, tanggap kung medalya.
kabang lalakad ku, mukyat entebladu,
kikyak bagya bagya, mata ku mamugtu,
deng kakung pengari, saya ing asilu, s
ebit ing medalya, king batal ku’ salu.
paninap ning isip, magbalik eskwela,
nanu mang papel ku, gewa king programa,
maging ‘guest speaker’, ing dengalan ku pa,
ikwentung tagumpe, kareng magyari na.
merapat ing buri, lukluk entabladu,
kasiping, kadane, meging mestra’t mestru,
nyaman pakiramdam, biglang menibayu,
mengat ku ‘pedestal’, pati pangatau.
ing lumang test paper, kakung pekasinup,
iting meg-umpisa, tagumpeng ayabut,
salamat king Mestrang tiwalang pigkalub,
pati king eskwelang nokarin migtapus.
