1.
Abalik de pamo kaya ing sadiang leguan ning ilug?
ing lalam na, ing linis na at masalusu nang agus
nung ilalam de mo kaya pagdayu burak at laput
ya na pin kaya’ing sulusyun kaniang banwa-banwang albug
mapaliari, nung ding tau manibalang magpakimut
samasnan de ing proyektu at ali la mangurakut
2.
Kalupa da ring flood control a gewa ring mapanekas
a contractor at ding tau a karelang kasapakat
nung inobran da la sana ding pruyektung miyamasamas
at matibe pangagawa dening floodwalls a paniabat
masalusu la man agus ring ilug e la malasak
at ding taldawa e la sa migmistulang dayatmalat
3.
Nung kulkulan do ring ilug apin kaya ing sulusyun?
o masayang la ring pera king gawan dang pamangulkul?
magbalik mu rin ing banlik king mapilan mung panaun
neng ing danum ibat bunduk king ilug ngan tutulandung
misna pa king karayuput uling mikisamut gabun
a sangkan king pangalasak ustung mayna la ring tabun
4.
Nung masalese la sana ding flood control a gewa ra
mekad e ta na danasan pa ing albug banwa-banwa
dapot uling ding aliwang kontraktor at kongresista
agiang ala no mang gewa kukobrahan do ring pera
Ing pamangulkul king ilug sulusyung pansamantala
magbalik mu rin ing banlik palabas ka mung pabanwa
5.
Lawan ta pin kayari rang mengakulkul dening ilug
nung ing balen Macabebe at Masantul e no lumbug
uling sawa no ring tau a bata namung mamalug
king dalan a matalusad a mengulapul nang lumut
ustung ya naman ing suma at e midayu ing albug
sayang no naman ding perang king pruyektu ra ginastus
6.
At kaibat ing prublema nung e ra asulusyunan
kayari rang megawa ring pruyektu rang pigastusan
migbaba ing gabun ngara at melakwan neng melakwan
king level ning danum dagat ing gabun tamung tutukluan
inia pin ating flood control a karelang pigastusan
ban ing prublema king albug karelang aparalanan
7.
Nung karing flood control project e sa mika-anomalya
mapaliaring yang pakibat king albug neng kauran na
dapot uling lamiran la ding aliwang kontratista
piraitnan de ing project at ding taung kasabwat da
ding tau pin naman rugo milalako la kunsensiya
at masisira diskarti ustung manakit lang pera
