1.
Minurang probléma kéti Pilipínas.
Limbug ya’t mébáting ing masálang búkas.
At ing kapanáyan oytá nang tínákas.
Alang makibálû nung nu’ ya’yti míras.
2
Mesirî ing dánup, mílálû ing táko.
At king pamanékas dakal lang melumo.
Détang mayupáyâ e la bísang tikdo,
Nya ing kapalaluan yang kabud na linto.
3.
Ing leguan ning bangsâ mengasalawlâ ya.
Ing kaban ning balen pinírat de bulsa.
Détang manibálâ mistúlang bulag la.
Makanyan lang limbug—melimas ding kwálta.
4.
Linto la ring kutang a alang pakíbat.
Míbatbat ya kang Juan ing cruz a mabáyat.
Ala yang agawâ nung e kabud ibwat.
Agyang e ya bisa, ala yang arapat.
5.
Kababayatna’ ne king pupusána’ na,
Pídurut dúrut de at piglíli de pa.
Ding dápat sumaup king kayang probléma,
Lakwas de mung sékab king mílálung dusa.
6.
Nánung ulaga na ning bie na king súlip,
Nung ing kapanáyan e maybud sumílip?
Nánung map a sangkan ing ‘ké na king isip,
King bang ing kalmá na layun neng mituklip?
7.
Kéning kábilya’ na atin pang tagumpe?
O mas mayapan nang mayári na ing bie?
Nánu mong akwâ na nung mang isadsad ne?
E na’ kaya lálung pagnasan ing mate?
8.
Ala yang singbáyat ing daralan nang cruz.
Dápot ating sáup at mánáyang lúnus.
At ing búkud dálan king ban yang mikábus,
Idala ne ing cruz…itang Cruz ng Jesus!
PL Jomar Chipe
