1.
Nung ngeni na itang aldo a mamun naku king yatu
Keni ta namu, bandi ko kilub naning bale tamu
Ali tá maglípolípo nung nukarin at nung kenu
Keni ta na magparayo kilub ning kekatang kuartu
2.
Sukul mu ku king kaul mu ali mu ku tatabilî
Panuman mo ring labi ku napnapan ta’ ining palî
Pikuentuan tang pasibayu kanitang akung pinilî
Arap ning kekatang Guinu karin tamu pepaytalî
3.
Palutu kung Yakisoba itang makiparo’t gule
Kalupa iniang kanita bayu ka tá pang miábe
Anggiang ala ka tang pera ali tamu mipapate
O kitmu tayang ligaya ing malati tamung bale
4.
Reng pinikulang piyalben a migpagaga kekata
Ilang kekatamung lauen retang Koreanovela
Ali ta la papaburen retang balang penandit ta
Kanaku lang pakasesen deng tauli kung pangisnaua
5.
Kareng malambut mung pago isandal ke ing buntuk ku
Mitundú kung mágparáyo mákiramdám king sunis mu
Ing kakung pusung maniglo king lawiwing mipnung yumu
Yang bosis mung makapasno anggiang ala ka king tonu
6.
Pilitan keng pakiyarian ining kanakung susulat
Balut ko king kauatasan rening amanu ku’t dapat
Mipnung lugud kapalsintan tipunan lang anting amlat—
Metipung kasalesayan ning lugud tamung masampat
7.
Bandi kung maniaman lugud, kapilas ning kakung pusû
Kening oras a mitubud datang ne ing kakung sundû
Oini, kabud nia mapatlud ing kakung bie a mesukú
Mekad ikamung makatud kening bie ta’ng mekalulû
8.
Asauang kakung palsintan Kanaku ka mákiramdám
Karening úsuk kung lakuan ibat king bie tamung dinam
E ka sana manamdaman king pusû mu la itanam
Ali mó sa kakalinguan munikala kung malalam
9.
Bandi ko, potang mete ku subukan mu pa ring mayli
Pasiknangan me ing lub mu king lungkut e ka paylili
King kuiad na niting bie ku ali ku binang migsisi
Magsayá kang pasibayu e ka magpilmi king bengi
10.
Kayari ning lukas paldas ali ka sa mikakunû
Babie ke ing kakung basbas bang buklat ing kekang pusû
Itang lugud tang meapas pabusten me sa’ng misúndû
Tanggapan kung atmu lualas yang keka tuneng susuyú
11.
Ing kaku sa’ng pakisabi ali me sa papaburen
Ing anak ta’ng Serenity iyang kekang pakasesen
Ika nang keyang sulugui ikang maging guia na ken
Kuentu mu ku sa’ng parati nung makanan keng babanten
12
Dagul ya sâ king kabiasnan apantun ing keyang bosis
Ing katalaruan yang tukluan, e ya sa kabud manangis
E ya kukurul king laban, keguian na yang mitayis
Akua na ing kekang leguan, king kayapan e magplidis
14
Potang ing aldo limbug ne—iyang kakung kamataian
Magpyak kung pakakalale matudtud kung makatiman
Sabyan ku kekang manene ika mung kakung liguran
Panaian da na ka abe king bie alang kapupusan
Poeta Jerome Nayra Manansala
