1.
Pakisabing mayap, keka o kupidu
ipangilag me ing, pana mu kanaku
pota kalabius yang, bigla ing uyung mu
at tumud ya kening, sidua’ning pusu ku
2.
E ka bisu-bisu, kaniang pamamanâ
uling magkang pota, ketang e mu sarya
Ing kanakung pusu ing kekang apana
karing adwang ilug, gulpi kung mamangkâ
3.
Bista’t man balu kung, ing kekang pagnasan
palabungan me ing, tune kapalsintan
dapot ating oras, malilyari misan
apapana mo ring, e dapat mituran
4.
Liling kapalsintan, kaku ilaut me
nung keka yang ‘yandu, pota sagmitan ke
e me darampulan, king malugmang kule
ing dalise lugud, a kaku mu binie
5.
Tatakut ku magkang, gulpi kung kalabkab
king sintang aluk mung, ume milalablab
lakuan mu ku pamu, ban e ne mabiyag
ing kakung pusu king inadya mung bitag
6.
Ding malugmang pusu a mebigu napun
Ilang pantunan mu’t , ukulan panaun
karela mo bugnus, ding bakal mung uyung
king pusung busilak, karin me idaun
7.
O kaya karetang, mangablad a pusû
a mengulumpis na, king dimlang milalû
tamban mu nong tamban ban lang mikalukû
ring dimut a api, king karelang salû
8.
Nung malyari sana, ing panigapu ku
ding kekang sibatan, tasakan paslu mu
retang alang lunus, miki-pusung batu
king ban dong luguran ding para rang tau
