1.
Nung kapilan ya mayari ining tete king Tulauc
ding memalen ning San Simun e ra balu pang tibubus
nung suryan meng masalese beinti porsiyentu pa alus
kening mesabing pruyektu ing karelang akikimut
magkasakit no’ng memalen ketang biyahi rang malaut
uling king Sta. Monica karin la pamu dudurut
2.
Manibat king migumpisa yang misara’ing Tulauc bridge
lalabas no ngan ding saken karin king San Simon exit
inia ustung rush hour na dakal la ring mabubusit
at ring mitatas a prisyun uli ning milalung traffic
ding kamoti rider naman no pang kahilig sisingit
buknul buknul no ring saken maki siksikan lang pilit
3.
At uling mikarakal la ring dadalan king La Trevi
papunta mc arthur hi-way lalabas la CDCP
ding manibatan Assumpta ustung aldo atin klasi
uling misna la karakal itang traffic mas matindi
ustung lulwal no’ng magaral mga bandang alas onsi
ding traffic enforcers karin masisira la diskarti
4.
Inia mika Executive Order na lang ipatupad
ding traffic management unit king linwal a bayung batas
ding anggang mamasadang bus e no magsilbing manguldas
at manyakeng pasaherus king e designated areas
mika bayu lang terminal a medyu malwalas luwalas
king compound ning Real Steel lele ning gate, mismung arap
5.
Ing karelang ipatupad maging epektibu kaya?
iti kaya ing sulusyun king traffic a makasora?
e la kaya magreklamu ding tau Sta. Monica?
a kukuldas CDCP neng manibat la Menila?
uling ining Real Steel marayu ya mu ring bagya
nung tagulud la mumuli mipalaut la pa yata?
6.
Nu la sake ding magaral at magobra San Fernandu?
nung ibawal dong manyake ding jeep ketang toll gate mismu?
karing tsuper a bibiyahi e ta makasiguradu
nung munta la real steel ban manyake karing tau
ustung iyan ing milyari dakal la ring magreklamu
uli ning gumastus la pang mag tricycle ding memaryu
7.
Kabang e pa mayayari ining tete king Tulauc
e salese ining traffic a tutu ping makakasnuk
ing pangasara ning tete magpabanwa na rin alus
angga king panaun ngeni ditak pa ing makikimut
ing kalbaryu ring memalen e ta abitasang lubus
nung kapilan la mipasno ing pakibat e ta talus…
