1.
Samantalanan ya ing pamikatagun
kabang maranun at atin pang panaun
Ing arapat tamung abak a maranun
e ta na pabustang miras gatpanapun
2.
Manasang durulung a matas ne’ing aldo
ala nong atima, balasing mang paro
nung manikwa la man den ng pakagato
asan a mebunggang likuan ding sinilo
3.
Ing aldo miralan e ta ne ayabit
nanu man ing gawan ali ne magbalik
marayu ne disan king panga-dalakit
kagnan ning oras a kaniti tinaid
4.
Ding taung mayagap ela malalakwan
malagwa lang miras king nasa rang puntan
inia king karelang pagnasang tagimpan
e re kilala ing nanu mang kabigwan
5.
ding managal oras lalakad mabilis
ila ding keraklan maralas mitakid
king panga-lakwan da ikwa rang melipit
king panaun inia tatagal lang pilit
6.
antimurin detang milalu kakupad
a bibilang waring takbang neng maglakad
king nasa rang puntan bayu la pa miras
kanan no ning dulum kanyang benging pisak
7.
nung inia ing dapat maranun tang kimut
ban e ta mitawli , miras king malaut
yan mang pagnasan mung biyabas a malulut
nung e ka mayagap muna ya pa’ing ayup….
