1
Taranati o balimbing, king amaru ring tagalug
metung yang prutas a ating, kabilangang limang suluk agiang nu me pa idane, at kekang pidurut-durut ya naman ing pigura na, e ya manaliwa alkus nung keka yang timalaran, king malapit o malaut mipaparewu ya porma, gilid arap ampon gulut
2.
Basi king kakung abasa, ining mesambitlang prutas kauri re pala kanu, ring panaslam tamung kamias ita mu pin ing lasa na, kekatamu yang akabas karing medyu malibatu, at manibalang a biyabas antimurin karing bunga ning tanamang mansanitas
ampo karetang milalu king ulut a sariguelas
3
Kelambatan ining prutas, pekiyarle de king tau
a tegurian dang supapi, karing anggang pulitiku nung kenu la makinabang, karin la ngan makapondu ala na nang kealiwan, karing danupan a asu deti ila ring awsan dang, sala-salingku prinsipyu tabi king salitang manong, alang kuwenta pangatau
4.
Ding balimbing o ring tau a ausan dang taranatî karing balang kandidatu mailig lang tuki tuki ing metung pang e masanting king karelang panugali e la mako at magdatun, nung nukarin la kakabsi dapot mengari lang linta, ustung ikua rang melangî daya ring panyipsipan da, malalagwa lang tabilî
5
Nung ing karelang tutukian, e rugu mikalmang limput deti e ra bitasa mang, panamdaman itang lungkut palabas kang pilan aldo, lumipat no ban tumanud king kampu ring kandidatung,mapalad a memaniambut
makiki-ayli la pamo, karing karelang karungut
at makiki-galamanu, kareta ngang anggang limput
6.
Aliwa mu ring botantis, ding darapat king makanian atin mu naman karetang, meninasang manungkulan a mesambut pauli na ning ala lang katapatan karing sadia rang kasangga a pilit pekilabanan o makananu mu la pin, naman rugung pagtiwalan ding awsan dang taranati, o ring taung baliktaran..
