1.
Galacgac metung yang, clasi ring animal
a maratun caring, bunduc at cakewan
uli ning tagle rang, e pangcaraniwan
deti masakit lang, bagyang panintunan
nung nanu culul ing, carelang tilpacan
yang magi rang cule, a pagmumulalan
2.
Caraniwang cule, ning carelang balat
asul a mapusyo, o berding matingcad
at ustung king gabun, la reti kinusad
cacule ra no man, detang tarebalac
cacaba la dilang, anti caring tugac
at tela asta lang, tiradul a gamat
3.
Den canung galacgac, agpang ketang siensiya’
inia manaliwang gulpi ing cule ra’
ban amantini ra, ing temperatura’
king catawan da ing, pali ampon dimla’
ing metung pang sangcan, panagcat ya pala
ustung bisa na lang, makipangasawa
4.
ing balu tamu mu, magbayu la cule
ustung mipacat la, king nanu mang bage
canita king cacung, sariling palage
ya ing paralan da, ban ipangilag de
ing bie ra karetang, bisang macamate
anti ring ubingan, ampo pang balawe
5
Uling dacal no ring, mengacalbung bunduc
inia ring galacgac, melagad lang lubus
e anti canita, agyang ken mung dicut
nung ayabwang ta la, tambing lang salicut
6.
Dapot calabas ning, macabang panaun
e na masakit ing, caren pamanintun
ngeni akit mu la, reting maglimayun
ustung malapit nang, datang ing elecsiun
payalis-alis la’t, magbayu direcsyun
nung nu la cacabsi, carin la magdatun
7.
Ila retang tau, a mapad macyabe
caring puliticung, caren macapamye
dapot ustung meging, malyap ne’ing tagumpe
king susuportan da, tambing batingan de
canita mu akit, ing tune rang cule
o ing ugali ra, ring alang marine
8.
Macanian la naman, deting puliticu
a e mipilmi king, metung a partidu
nung ninung balu rang, masican a grupu
carin la macyabe, ban manicuang botu
ila pin ding tau, a alang prinsipyu
at king sarili ra, ala nang rispetu
9.
Inia caluguran, magi ca sa’ng tapat
caring cayagum, a abe nang malambat
e me mumusingan, ing kecang dignidad
uling masakit nang, milaco ing dinat
ustung pemansagan, da na cang galacgac
king pangatau mu, pilmi neng mipacat…
