1.
Ustung mesilab ing dikut a malangî
e binang maglambat, agad malumpawi
pangaduluk na king, milablab a api
malakuan ing abu, midayu ing palî
2.
kabang mitatawu, ing impun ning dikut
manalabsik itang, baya’t maglagutuk
pelalung sagiwa, a karin miyubyub
kalabkab mu naman, kaibat nang minasuk
3.
Ing lablab ning api, kaba mung umpisa
mikakalukung e, maybug payaguanta
potang kumabsi ne, king anggang liklak na
kabud ya mabating, e mu ne akit pa
4.
Ing nanu mang dikut anti mo ring ilib
malaiking pusa, garama, talaib
malangi mu sana e ka magkasakit
manyilab at gawan iting pamarikit
5.
e anti king impun at dutung a masias
malambat ing api, nung yan ing masilab
pati ing baya na, e matatdang agad
anggat e malaso’t, maging abung ganap
6.
Misan ing dapat ning, tau ayanti me
king masisilab a, dikut king marangle
kabud mikalabkab, penandit matda ne
king beit nang api, ya ring makamate
7.
Ating masigasig, king karelang obra
a e misasadsad, angga lang umpisa
inia masampat man, ing kapakayan da
maging maliap ya ing, tagumpe karela
8
nanu man ing bage, tamung inumpisan
pakikuanan ta la sanang pakiaryan
e baling maluat nung, ing bunga na naman
ing maging dalan na, ning kapanyulungan
9.
E tamu mangari king api ning dikut
a kaibat milablab tambing sasalikut
karing dapat gawan, e tamu patugut
kabang e ta miras ketang pekadanggut
