I.
Bakit kaya balang banua mitatas ing matrikula?
a kekatang babayaran karing pribadung iskuela,
malulugi la mo kaya ketang sadyang sisingil da?
o ugali da na itang mailig manyamantala?
II.
Pota naman neng balu rang ayunan na ning gubyernu,
ing karelang kayaduanan inia o reng manabusu
makibandi karing haiskul at iskuelang kolehiyu
at karen mang kinder garten at nursery a mi-usu
III.
E naman mo kaya ating mararapat a sabwatan
karing pulitiku at king institusyun ning kabiasnan
buri dong manatili ding kalulu king kakaluluan?
at nasa dong igapus ding anak ta king kamangmangan?
IV.
Ban kanita ding kalulu e la mukyat ketang babo?
at ila mung mangakualta detang karin magpalayo?
e la bisang misalatan, king puestu ra mamaglako?
neng karetang luklukan da e no bisang mamanikdo?
V
ding kalulu anti waring papalbug do ketang burak
king ban deti kabang bie ra karin na la makatalpak
bakit e ro buring dinang kapasnawan agyang ditak?
Uling iti metung ya mu karing karelang pamalak ?
VI.
Pablasa ping tatakut lang mibusni la kaisipan
kayanakang ma-prinsipyu, marangal at matenakan
uling deti ring sumbagal king karelang kapagnasan
at imbut rang ipasa king anak da ing katungkulan
VII.
Karing sikat a iskuela a kalupa ning UST
Lyceum of the Philippines, Ateneo at Feati
king De la Salle ding magaral mangakualta la’t di kotsi
Nung atin mang kalulu ken scholar lang istudyanti
VIII.
At ding mapilang kalulu a karela mipasalat
mekad abilang ta la king taliri tang adwang gamat
nung e la mapibabata magkang e la rin manyadsad
karing aparti pang singil da reting unibersidad
IX
Samantalang ding keraklan angga la king pang-publiku
iskuelang pagmaragul na kekatamu ning gubyernu
ding bilang ding istudyanti masyadu lang limitadu
kulang la king pasilidad e la pa kumpletu kursu
X
Sakali mang mayari la detang anak a magaral
karing iskuelang mesambit ala lang obrang aluban
uling maging ding kumpanya sasalakan da la naman
aplikanti nung nanu la kulehiyung penibatan
XI.
Yan ing masalang katutuan a pilit dang sasalikut
deting pyudal ampon burgis king gubyernung mabubuluk
Inia sana o pengari tatagan ing kekayung lub
anak tamung papagaral kekata lang idagisut
XII.
ining balen a makamal nukarin ya kaya santung?
nung mas dakal la ring mangmang king daratang a panaun
Mangari ta nang kulbasa dusug ya man at lumabung
dapot detang kayang bunga malakuan la mu king gabun…
