I
Mengari ya naman king tinubung dicut
metabas na’t sabla’t meyaswal a yamut
macapagmulalang caibat nang meputput
micabucasan mu ating bayung lalsut
II
nanu ya mang clasi ing tibua’nang gabun
ustung mababasa king marimlang ambun
lacuas maniagiwa aluntag nang bulung
ning dicut, lalu neng abac a maranun
III
Wa man ustung misan, acua nang lalangî
king pangatangad na king aldong mamapî
e mateng tibubus acua nang mibawî
caras na ning benging kinumpa ing palî
IV
Ing mumunang sinta anti ya ring aldo
maningning a batwin at bulan king babo
mipampanan la man king bigang gagato
dapot atiu la rin at e la mamaco
V
O’bat ing lugal na king kecatang pusû
ning minunang sinta e midayu-dayû
wa man meging sangca’ne ning pangabigû
ustung aisip me cacabag ca salû
VI
Meging masalpac man ing kecong piyabe
ning minunang sinta a keca miwale
e me acalinguan daralo yang pane
king caisipan mu agyang iwacsi me
VII
Nanu ing tagle na cayang cayupayan?
a e ta asagca king sintang miralan
e ya caya meging sumpa ing casebiang
ing mumunang sinta alang camatayan?
VIII
Nanu man ing sangcan mecad sangcap na ne
ning capalsintan at lugud a dalise
simpanan ta ne mu at king pusu ike
e ne man sumbagal king kecatamung bie
