Aktibong tumutulong si dating Vice President Leni Robredo sa kampanya ni dating Senador Bam Aquino bilang senador sa darating na halalan sa Mayo.
Muling nagkatagpo ang dalawa nang bumisita si Aquino sa bayan ni Robredo sa Naga City pagkatapos ng isang event sa Bicol University sa Albay.
Sa isang Facebook live, hinikayat ni Robredo sa kanyang mga tagasuporta na tulungan ang kandidatura bilang senador ng kanyang dating campaign manager sa 2022 presidential elections.
“Hindi pa pwede magkampanya ngayon. Pero sa February 11, start na. Start na ng kampanya. Talagang all-out tayo, sa mga dati po nating mga kasamahan during the campaign,” wika ni Robredo.
Kahit mas matanda kay Aquino, sinabi ni Robredo na itinuturing niyang kuya ang dating mambabatas dahil sa pag-aruga at gabay na ibinibigay nito sa kanya, lalo na noong panahon ng kampanya.
“Mas bata pa siya sa akin, pero kuya na ang tingin ko sa kanya kasi noong national elections, siya ang nag-asikaso. Alam ko kung gaano kabuting tao, alam ko kung gaano kagaling,” wika ni Robredo.
“Sabi ko sa kanya, gagawin ko ang lahat para matulungan siya sa eleksiyon,” dagdag pa niya, kasabay ng pangakong tutulungan ang kampanya ni Aquino sa Bicol.
Nakapasok si Aquino sa Top 12 ng mga nakalipas na senatorial surveys para sa halalan sa Mayo.
