*
Ang taunang BUDGET para sa pamahalaang lokal
ng SAN SIMON hanggang ngayon ay hindi pa natalakay
ilan daw sa magigiting na KONSEHALES ng bayan
di dumadalo sa SESYON upang ito’y pag-usapan
at dahil sa nangyayari na tila KABULASTUGAN
ang labis na APEKTADO ay ang mga mamamayan
**
Ang PONDO ng bawat bayan nararapat talakayin
kada taon bago pa man o eksakto sa FISCAL YEAR
pag-uusapan ang budget na kanilang lulustayin
halimbawa’y sa PROYEKTONG ninanais nilang gawin
PUBLIC SAFETY, EDUKASYON at sa iba pang gastusin
sweldo ng empleyado at maging sa PUBLIC SERVICE din
***
Base sa’king nakalap na RELIABLE INFORMATION
wala pa ring nagaganap na SESSION hanggang sa ngayon
at dahil sa pangyayari ay may namumuong TENSIYON
sa panig ng alkalde at sa grupo ng OPOSISYON
ba’t di nila pag-ukulan ng atensiyon at panahon
sinumpaang tungkulin sa ilalim ng KONSTITUSYON
****
Dahil sa kagagawan ng ilan nating PULITIKO
hanggang ngayon ay wala pa ring budget ang MUNISIPYO
paano matutugunan pangangailangan ng tao?
kung walang mapagkukunan at di sapat pa ang pondo
ano ang kahihinatnan nitong lokal na GOBYERNO?
sa aspetong KALUSUGAN ng serbisyong pampubliko
*****
Batay sa aking opinyon at sa aking nakikita
ang mga pangyayari ay may bahid ng PULITIKA
sa panig ng oposisyon ay mayroong pagdududa
baka PERA ay magamit para sa pangangampanya
subalit kung susuriin bakit sila MANGANGAMBA?
kung pondo ay ilalaan kung saan dapat mapunta
******
Bakit hindi nila gawin kung ano ang naaangkop
na serbisyong pampublikong dapat na ipagkaloob
sila’y HINALAL ng tao upang sila ay maglingkod
sa paraang MAKATAO, MAKABAYAN at maka-DIYOS
hindi upang magtamasa lamang sa PANGUNGURAKOT
sa pondo ng inang-bayan na palaging NASISIMOT
*******
Ganyang uri ba ng tao ang dapat na MAIHALAL?
na kandidato para sa nalalapit na HALALAN
kung simpleng usapin pa lang di na magkaintindihan
paano pa haharapin ang bagay na maseselan?
ano ang kahihinatnan nitong ating INANG-BAYAN
kung sila maghahari dito sa ating LIPUNAN
