Anyang ikit daka, agad kung sininta,
Timan mu king labi, mapunge mung mata,
Salu ku sinasal, kayang apilasa,
Matudtud kung pusu, migising yang kusa.
Palawe lawe mu, nokarin ka banda,
Arap ning bale mi, pag dadalan naka,
Iwasan mung akit, mimingat kung bina,
Pota nung asilip, gawan mu ing lisya.
Ot kaya makanian, malamarine ku?
Kakarug mang atuan, akilala pa mu,
Pag ume kung gawan, magnerbyus kung todu,
Pilan pa mung takbang, magbalik king pwestu.
Ing imahinasyun, parating daratang,
Mitatalnang gamat, misan aakbayan,
Masaya ku’t ika, king palsintang andam,
Uli nung migising, angin yang dinalan.
Pantasya ya wari, o mangarap ku mu?
Kakung pamaglolo, agad kang tinangu,
Sumpaan tang adua, na alang magbayu,
Dalan king kutkutan, lugud mu’t lugud ku.
Maninap ku mu pin, uling n’yang ikit ka,
Emu ku pinsinan, kasi e kilala,
Yaku king sarili, makabalu keka,
E talus binandian, ning pusu’t kaladua.
Angga pang kapilan, sikanan ing lub?
Pota king kalwatan, ika mipalaut,
Maliligaya na, king sintang mepuput,
King kakapanaya, ‘tin nang munang lugud.
Nung palad ku iti, e ku na pagsisian,
E mu akung dili, karas kapalsintan,
Sapat para kaku, ‘tin kung luluguran,
Waring migsing-irug, ‘la ka mang kabaluan.
