1.
King kekatang bansa bina nong marakal
ding manyese asu nukarin mang lugal
miyaliwa no klasi ring lahing mamaglual
karetang IMPORTED, ASPIN ampon ASKAL
2
Ating german sheperd., ridgeback, pomsky, boxer
chowchow, husky, pitbull, at boston terrier
greyhound, japanese chin, pomeranian, pointer
saint bernard, jack russel, chihuahua, rottweiler
3.
Maralas K9 la, ring gagamitan da
karing operasyun ding NARCOM king droga
antimurin detang larinu king bomba
karing snipping dog la naman mamasa
4.
Ding asu ila ring mayap diling bante
kilual man o kilub ding kekatang bale
bukud pa kanita tapat lang makyabe
karing lilingap a karela manyese
5.
Karing asu ating misna king katunud
lakuas ring misane king lambis ning agud
ating mapanagal at mapanyagudsud
ampon taimik a sasagpang na cabud
6.
Dapot makatakut la ring alang ikî
uling matsura lang dili panugalí
ren apin ding asung e bisang kawanî
a karing amu ra pane makatukí
7.
Ila ren ding sese ra ring pulitiku
a mas mabagsik pa karing tutung asu
bukud king masikan karelang pamau
pane pa’ing kaung da baski alang tau
8.
Karing babanten da e ka man milapit
nung e ra ka kapad agad dang bubungit
ngisngisan daka pa ba ra lang ipakit
ding pamatakut dang matilus a patsit
9.
Makanian man caring asung mesambitlâ
atin namang mayap ampon maganakâ
dapot mas dakal la retang makasorâ
a tutung masangil ampon mapangayâ
10
Apakit da sanang malugud lang tune
karing lilngap a karela manyese
baski pa buldit da karen padilat me
gawan da agia mang as ne king kabange
11.
Mimingat co caring makanian a asu
uling pota rugu akinis da kayu
agpang caring doctor karin San Lazaru
king tagle rang “RABIES” ala pang panulu
