1.
Karing mengamate a mebie king labuad
agpang karing pastor ala pang miligtas
makanian mu naman sasabyan ding pantas
a manalumpakan basi king misulat
2.
At ngarang sasabi ren kanung kaladua
karin purgatoryu manenaya la pa
king pamag-ukum o kadwang panyatang na
Guinung Hesukristong menatbus king sala
3.
Non de pantunan ding tau’ing kaligtasan?
King mayap dang depat babo ning sikluban?
O king relihiyung karelang tutukyan
O kapanwalan da king Indung miglalang
4.
Nung king dapat iti binang masusukad
ligtas nala kaya ding anggang mangayap?
makananu no man detang mangarawak
taglus la impiyerno ban karin masilab?
5.
At nung kapanwalan ing maging batayan
nanu ya ing sektang marapat a luban?
king keraklan da ren emu ne balu man
ing dalan para king tune kaligtasan
6.
Uling king paralan na ning pamanyamba
e pare-parehu ing maging sistema
katoliku ya man, born again, iglesia
protestanti at ding saksi ng jehova
7.
Kristiyanu la ngan den nung pitutuliran
at kang apung Hesus talatuki la ngan
dapot maralas ing pamisalungatan
king interpretasyun king bibliyang banal
8.
e wari malino a masasambitla
i Kristu ing dalan, katutwan at sala
at nung ninu la man cing ‘KAYA” manwala
miras ya karinan ning “INDUNG DAKILA”
9.
kekatang balikan ing meging eksena
king bunduk ning bungu karin king Golgota
e wari atin yang kayabe makagpa
ing “ANAK NA NING DIYOS king mingatbang krus na?
10.
Nganang migsalitang Hestas dane kaili
“nung tutu ping ika’ing Mesias a mesabi”
“ba’t eme iligtas ing kekang sarili”
“at pakyabe mu na” ,pati na ikami…
11.
Sebyanan neng Dimas itang kayabe na
“eme katakutan ing Diyos?” ngana kaya
“king kekatang gewa a pamikasala,
marapat mung iti ing maging parusa”
12.
“Dapot ing abe ta’ alang kasalanan
e karapat-dapat man a miparusan”
“Hesus” nganang Dimas “emu kakalingwan
ing ituki mu ku king kekang kajarian”
13.
At nganang mekibat Guinung Hesukritu
king makasalanang taung manigapu
“eni mu rin ngana akayabe mu ku
painturu kata ketang paraisu”
14.
Nung panigaralan tamung m’yamas-amas
ketang oras ay’ta atin nang miligtas
Uling ing amanu a karin mebigkas
Iti alang duda ume neng metupad
15.
At nung sukat iti e tamu panwalan
Guinung Hesukristu lunto yang malaram
mapalad ya’y Dimas a mipangakwanan
maranun nang tinggap itang kaligtasan
