Kung wala ang droga na ipinapasok
sa’ ting inang-bayan nitong mga druglords
wala sanang adik at pusher na salot
at mga kriminal na ugaling hayop
Wala sanang bangag na nakakaisip
na manggahasa ng mga batang paslit
wala sanang mga gumagalang adik
na nagdudulot ng matinding ligalig
Di sana nakulong ang isang senador
na inakusahan na druglord protector
at wala rin sanang napaslang na mayor
kung walang pulis na ginawang tirador
Wala sanang mga alagad ng batas
nagsagawa noon ng OPLAN GALUGAD
walang tatlong itsik sana ang nautas
kung hindi tiwali ang ilang prison guard
Wala sanang buhay na biglang nasayang
sa umiral dating OPERATION TOKHANG
wala sanang mga nagluksang magulang
asawa’t kapatid ng mga napaslang
Wala sanang mga nasangkot na pulis
sa pagkatumba raw ng maraming adik
walang taong bayan sanang nag-iisip
na ang impluensiya dito’y nanagamit
Wala sanang gulo noon sa senado
dahil sa nabistong mga kontrabando
drogang ang halaga’y bilyon-bilyong piso
sa Bureau of Custom noon diumano
At wala rin sanang Kian delos Santos
batang pinaslang na disiyete anyos
habang may tulak at hindi nauubos
giyera kontra droga’y hindi matatapos
Ang lahat ng ito ay dahil sa droga
na sa ating bansa’y lubhang talamak na
di sana lumala ganitong problema
kung ang ugat nito’y binunot noon pa
Mga mambabatas sa kasalukuyan
ay nagsanib pwersa upang bigyan daan
itong pagsisiyasat sa katiwalian
sa hanay ng ating mga kapulisan
Nagsalita na ang ibang resource person
sa mga hearing in aid of legislation
high ranking officials ng PNP noon
baka masabit pa kapag nagkataon
Problema sa droga’y hindi matatapos
hanggat mayrong mga pulis na kasangkot
masamang ugat ay magsisilbing salot
habang umuusbong at di nabubunot
Mga pulis lang ba dapat ang tutukan
ng imbestigasyon sa kasalukuyan?
hindi kaya ito’y dapat pang laliman
upang matumbok ang pinag-uugatan
Narco-politicians, ang dapat malansag
at mga druglords na kanilang kasabwat
sapagkat sila ang nagsisilbing ugat
ng drogang salot sa bansang Plipinas
