1
King malinong danum, ning malalam ilug
Lupa mung akakit, lululto, lulumbug
Nung misasalbag ya, uli na ning agus
Binang e maglambat, mibalik n’ya kabud
2.
Nung manakit naku, papasyuk a ayup
Masanting mung lagyu, damdam ning balugbug
Pag sinulapo ne, munta king malaut
Kakung apilasa, mibalik ing lungkut
3.
Ing tyup na ning angin, babangga kanaku
Ali ya ing dimla, nune ing kaul mu
Bigla nang tinuknang, ali na asapu
Wangis n’yang kawani, ‘tang betingan mu ku
4.
Apapaninap ka, maski na king tudtud
Ing misan kayabe, meligayang lubus
Maralas malyari, e mababalaus
Saguli mung tula, kanaku pegmaymut
5.
Pag susulat naku, tatalnan ing pluma
Letra ning lagyu mu, kanaku didikta
Kanitang milabas, aganaka ku pa
Palitan tang sulat, na ngeni ala na
6.
Ot akakit daka, king mang madalumdum
Mekanian ba’t bakit, mata kung mesaul
Pati na ing isip, alipang misukul
Sintang e mamate, keka mu inukul
7.
Sabian king arap ku, ala na kang lugud
Aling e na mikit, kinawani kabud
Nung nanu ing sangkan, tanggapan kung lubus
Baluku ing kaplas, kaku mu pagkalub
8.
‘Gang ngeni mangutang, ala pang pakibat
Ing kwentu tang adua, king yamung libutad
Nung sakaling datang, akwa mu ng marap
Hatul a panayan, dapat nang ipasyag
9.
N’ya angga ngeni, makatali parin
Kapilan makalag, kening panga-bitin
Tabak ng Damocles, kanakung pasanin
Mitarak ne sana, metung n’yang saingsing
.10.
E ka akalingwan, nung nokarin ka man
Misteryung mewala, bula kang lebulan
Ayagwanta ku ba, na ikang panayan
Uling angga ngeni, ikang luluguran.
timpapalis ning San Luis
zeran/9/7/2024
