Sumuyu ya at magsilbi keting balen at king masa,
Inya ketang magaral ya karing dalan gulisak da
Ding meralpak a matulid ban mirinan lang hustisya;
Uli niti pigsikapan nang magyaring abogasya,
At ban karing meduhagi kareti makasaup ya.
King kursung pigdulapa’na inyang iti mayari ne
Detang misandalyan marok king kulungan da inugse,
Serbisyu na alang bayad lalapit nang karen babie
King kilub na ning husgadu pakilaban na’lang pante
Pablasang ing kayang imbut ing matulid akamtan de,
E bala nung mitibi king kamatayan ing kayang bie.
Ding memalen nyang akit da ugali nang binang mayap
At ikit de malasakit king bili ring anak pawas,
Memalen a sinopa’na pinilit de at inagyag
Ban tagal yang bisi mayor keting kekatamung syudad,
Angeleñong misan-metung ing matni rang gugulisak
Ibotu ya’y ED PAMINTUAN, Bisi Mayor ngarang gagkas.
Sinambut ya bilang Bisi at ding kayang akalaban
Likwa’nalang milya-milya king resulta ning botuhan,
Uling mika problema ya ing mayor a kayang tikyan
Ya ing meging “acting mayor” keting syudad menungkulan
Ketang kayang panga-mayor meka-pilan ya pang bulan
Memakbung yang Pinatubu trahedya itang melakwan.
Ketang abu ampon balas dakal itang mengasira
Mitambunan yang palengki king lahar a minyalasa,
Karing tete na ning syudad daka’la ring mengaragsa;
Ing Barangay Balibago ban e lubus masalanta
Mayor ED-PAM, ding memalen kayabe re ketang sapa
Patingapun mag-“sand bagging” ketang pampang da kakana.
Kanita ya kinulait, “Angeleño AGYU TAMU,
Abe-abe yang pamingwa iting syudad king delubyu”;
Saup-saup lang kinimut anting metung detang tau
Lininis de iting syudad inya mika-pamagbayu;
Inyang datang ing halalan nagyag de ring Angeleño
Ban tagal yang bilang mayor – binotu reng pasibayu.
Kapupus ning adua nang ‘term,’ tagal ya pa sana kaibat
Mayor Ed-Pam anam banwa a migserbisyu king syudad,
Pablasang king tungkula’na malinis ya at matapat
Ding magnasa king puestu na king Kongresu re inagkat
Inyang iti mabisa ya, pangaras na king libutad
Gilutan de retang lilung kamaganak na’tang Hudas.
Makanyan ing mepalyari… anti ria’mung sibung pala
Y Mayor ban king nanu mang puestu e ne mikatsansa,
Dapot e la menagumpe – mig-Presidenti ya’y Gloria
Pepayus ne y ED-PAM… NHA mig-“ manager” ya;
Karetang “informal settler” ding sinopa’na daka’la
Mikasarili lang bale ding “squatter” a ausan da.
Kalabas ning pilan banwa mibalik ya keting syudad
Bankanita yang maglarin king milyaring alingasngas,
King tungkulan bilang-mayor pasibayung linibutad
Ding memalen ning Angeles ing tula ra e mu ditak;
“ABE-ABE AGYU TAMU”… ing matni rang gugulisak
Inya naman menagumpe itang banal dang pigagap.
Nyang lukluk ne bilang mayor matapat yang migserbisyu
Keting kekatamung syudad karing sablang Angeleño,
Kanita na king Angeles linto’ing dakal a proyektu;
Nanupata ing gewa na maragul a pamagbayu,
Megawa la detang kanal, dalan melapad lang ustu
Inya ring daralan karen asna la king kakuswelu.
Ing mamamate kultura at Salitang Kapampangan
Biniayan na keting syudad at layun pepalabungan,
Inya naman king konsehu ating batas dang lelangan
Kapampangan ing amanu a sukat munang gamitan;
Dapot agyang masalese itang sabla nang daraptan
Ngening katlu nang terminu karela yang pakisiran.
Nanan da na’ing alasak de ding kaya aplit manyira ,
Katungkulan na king syudad uling buri da’mung akwa;
Angeleño, suryan yu la ding taung kanyan magnasa
King milabas a panaun nang’ masalese rang gewa?
Ngara king droga mo kanu i Ed-Pam kasapakat yata?
Ninung matinung memalen ing kaniti maniwala?
Ing ABC sasabya’na – anti murin ding Kapitan
Ing indredus dang kakalat ditak man alang katutwan,
Detang lahi nang Pilato minuna ra nang depatan
Peparusa re’yng Ginu agyang alang kasalanan;
Inya deting Angeleño matibe rang paniwalan
Iting kaya bibintang da…. e na gewang MAYOR ED PAM.
Rolly T. Sagmit,
Saba nang Tugi
Mexico, Pampanga
