KUNG ganitong pati na mga pinatay
ng ‘hired killer’ o ng lihim na kaaway
ni Juan ay kay Duterte ini-uugnay
nitong sa kampanya niya ay pasaway
Partikular hingil sa bawal na gamot,
at kung saan walang humpay ang batikos
ng hindi kasangga, malamang umabot
sa kalahati ng dilawan ni Panot
Ang kontra barata na katulad nina
Risa Hontiveros, Trillanes at saka
ng iba pang di na tinantanan siya,
anong maasahan natin sa kanila?
Kundi ng tiyak na pawang negatibo
na mga pahayag laban sa Pangulo,
imbes katigan ang adbokasya nito
laban sa paglala ng masamang bisyo
Sapagkat simula nang kanyang ilunsad
ang kampanya nito ‘vs. illegal drugs’
di na tinantanan ng kung anong pintas
ang anila’y mali niyang pamalakad
At kung saan nga r’yan ang ant- Duterte
ay sa kanya lagi nang isinisisi
ang pagkamatay ng itinomba pati
ng iba, at siya’ng bagsakan ng sisi.
At kulang na lang ay pati na kinitil
ng holdaper ay ang administrasyon din
itong ninanais na papanagutin
ng mga kalaban ng Pangulo natin.
Sa akala kaya natin kung hindi siya
itong pinalad na mahalal, ilan na
kaya itong adik at lulong sa droga
sa panahong ito sa Metro-Manila?
At maging sa lahat ng dako ng bansa
ay marami na ring sa droga sugapa,
kaya’t bago pa nag-pangulo ng bansa
si Digong, matindi na r’yan ang pinsala
Na idinulot ng di pag-asikaso
at kawalang paki ng nasa gobyerno,
partikular noong ang batang Aquino
ang sa Malakanyang nakaupo mismo.
Kaya nga’t kung hindi si Mr. Duterte
ang pinalad para maging presidente
(sa panahong ito), ‘within one year to three’
pinasususo na ang shabu sa ‘baby’
At marahil kung hindi rin si “Rodrigo”
(tawag sa kanya ni Donald Trump), tantya ko
malamang pati na sina Lola’t Lolo
ay sugapa na rin sa lintik na shabu!
At baka kung sino pang basta isangkot
ng Napolcom at ng PDEA sa gamot
na bawal para lang ‘yan may mai-report
kay Pangulo upang gumanda ang record?
Na kagaya nitong bigla ay naglabas
itong Napolcom ng detalyadong ulat
na ang mayor sa isang bayan nitong Tarlac
at city mayor sa Pampanga’y kasabuwat?
Kasama pati ang labing pitong mayor
at isang umano ay ‘sitting governor,’
na ‘individually & clearly’ ay tukoy
ang pangalan nila sa ‘list’ ng Napolcom?
Sana, bago tayo maglabas kapatid
ng anumang isyung nakapananakit,
‘human rights’ muna ng baka idinawit
lang ng kung sino ang unang isaisip!
