Kabang dakal dapu ampo pang galakgak
karing manungkulan keti Pilipinas
angga na king muti la bulbul ding awak
ala tang malino kararasnang bukas
Kabang ing bangan a datukanan pale
e re patugutnang buburikyang pane
ring kampun ning dyablo a alang marine
nanu pang mitagang sukat ipagkabye
Ala na! nanu pa? agisan da na ngan
pelalung latak a karin makasimpan
ania nanu pa ing sukat tang asahan
nun e kimut na king sariling kagiwan
Makanian ya ngeni kabilyan ing bansa
a pamugaran ding taung mangasiba
angga la kapilan rugu magpasasa?
kabang ining balen epa makaragsa?
Kabang atin taung susulapo isip
a miyayambunan king grasyang kapurit
kabang dakal la ring alang malasakit
kening indung balen a mipapaidpid
Kabang atin taung magmamatudturan
a e matatagkil a kapanandaman
kabang dakal la ring silo panimanman
king kislap ning pera at gintung kikinang
Kabang atin taung masasali botu
at manungkulan ding e dapat mipuwestu
karing akakit dang dapat a e ustu
nanung karapatan da pang magreklamu
Ala na! lalu pa? nung mibayaran ka
king karapatan a seli ra na keka
at balamu asu naka mu karela
king as’na kababa a panlalawe ra
Nung ika metung ka karing mesaglawe
at manalig mu king parati dang babye
atin ka pa mo pin kayang bosis, abe?
ban salangsangan ng matsura dang pake
Uling kabang alang pamisasanmetung
king mayap a nasa bigu ing panyulung
inya ban matupad kekatang ambisyun
magi ‘tang maingat king pamag-disisyun
nanu la ring ustu a sukat marapat?
pilinan nung ninu ring karapat-dapat
kanita ta pamu mituntun king mayap
at midinan dalan ing gintung paninap..
