KASEBYAN, ing tau bisa ya’t e bisa
mate ya karas na ning oras a tikda
ning Dios a linalang keya, at king sabla
a tatangalan na keti king masala.
Pero yan maralas pasari ning tau
mate ya’ing nanu mang lelangan ning Ginu
king uli ra naman ding kaparang-tau,
a ing karaptanan da e makatau.
At ila ren detang king uli ning kislap
ding salaping imbut dang malaguang miras
karing palad deti ing mitsa maralas
na ning e maka-Dios at matsurang dapat.
At waman kapalit na niti nung misan
disgrasya para king kaparang lelangan,
iti ayamyam da ring mayayanimal
kapamilatan ning kalapastanganan.
Makakimut ka pa, nung “Huwag kang kikilos”
ngana keka niti kabang makatutuk
ya keka ing baril ning dipa’ ning diablus
king kekang papaluan o lalam balugbug?
Dakal lang makanyan king panaun a’yti
a ing mangibabo para king sarili
ya itang makatalan lang salapi reti,
pati kaladua ra isugal ding alti.
King bage e mayap, at nu’ ing maralas
a kalamnan na ning kakung bubulalag,
makaparikil yan king e ustung dapat
ning pataniran ku a malabno utak.
Aa nu’ masasabi ya mang propersyunal
at maki-titulung sukat ikarangal
pero akua na sang’ manakitan dakal
pati bie ning tau, keyang isusugal.
Sangkan a nung bakit ya ing mekapate
king kakung esposa a e man mirate,
dela mi ya Makabali ban palawe
ing keyang papaluan nung atin yang pile
E ku aintindian lubus ing milyari,
nung ing misis ku in-Xray de o ali;
Intasang ing doktor a masasalbahi
kabud na niamu pin deyalysis iti?
At nu’ e na ku man pormal pekisabyan
nung makananu at binang makailangan?
Sana inisplika na pa ing bage yan,
bayu na gewa ing inggil keng makanyan!
Inya keng depat na niting ‘Nephrologists’
at meging mitsa ning bie ning kakung misis,
yan tadtaran ke mang tianting dagul mais,
kulang pang king mua ku ing bie na ipalit.
Makanyan man uling balu kung ating Dios
at Keya maragul ing kanakung takut,
iti e ku gawan uling makatakut
ing karin manabu keta king Impyernus!
Nu’ne idalum ku nia mu ining doktor
a e ‘resident’ man nu’ne pribadu mung
serbisyu ing keni na niti pamag-‘round,’
pero mamroplema pati ing Director
Nining ospital a nung nu’ ining Ramos
kwenta ‘sideline’ namu ing keni ya lulub
bilang ‘Nephrologists,’ dapot ating karug
salu kang Doctor Yap, pati ya misangkut.
Waman ing ospital nung pitutuliran,
mapalyaring ala yang kapakibatan;
antining y Ramos ala yang direktang
relasyun, uli ning e empleyado bilang.
(At den king ausan dang ‘Employer-Employee
Relationship’ e la yata ‘binding’ deti;
Tabalu mupin nung ining Atsing Lety,
king bage yan, nanu ing keyang asabi?).
