ALA YANG bitasa ngarang pikarugan
o kikingdingan ing mapuring Cuyugan
lalu pa’t karas keng e makatuliran
at makabalen a pamanalakaran.
At pablasang iti e ya naman dangat
makiarap kenu man a magpaparagas,
ing Don agyang kenu e tatakut marap
karas keng matsura at e ustung dapat
Inya naman ketang yang makapanaun
a punbalen niting ngeni asensadung
siyudad, yan gewa na ing takda ng tungkul
king pelalu kayap at bina kanayun.
Kanita pa, metung neng mabayat-bayat
a problema ing keng ilug yugse palak
ning atbu, a ngara king Sentral manibat,
inya y Cuyugan minaksyun yang agad.
Bilang mayor, pintan ne ing PASUDECO
a manugse katas at sapal ning atbu
(keng kailugan ning balen San Fernando),
at inutus nang yan isara reng todu.
Ing kanita konsehal at meging Alkalde
na ning Menila, Manuel C. dela Fuente
a kakampi karing interes da reti,
yan pemalagyuan neng alang utak iti
At anti’ing gewa na karin king Chicago
inamun ne iti king metung a ‘Duelo;’
Mupin, king bistaman tinggap ning galgahu
ing amun ning tau keti San Fernando
E ne man siniput king pisabing oras
ining Dela Fuente, king uli na mekad
ning akasubuanan namu niting tinggap
ing amun, king agyang e timbang a bayag?
Ban pakilabanan ing tune gereru
at talataguyud king talagang ustu;
a nu’ angga na king kinwa ne nng Ginu,
y mayor Cuyugan marangal yang tau.
Inya naman uling meging mapuri ya
y Tang’ Vencio, e mu keti Pampanga,
karapat-dapat mu ing mipabilang ya
karing bayani ning balen tamung sinta.
Nung nu’ kaugne na ning pamparangal
ning NHCP, king liping Kapampangan,
‘an unveiling this month of a historical
marker for him was held at barrio Del Pilar)
At nung king mesabi a pamagmasusi,
a makaparikil king mal tang’ bayani,
ing NHCP kwenta ing peka-pun saksi
ampon aliwa pang kekatang kalipi.
Inyasa’t antimong tune Kapampangan
o kalalawigan nang Ginung Cuyugan,
mangaintulid mu ing kilalanan ta’yang
kabilang ding meging bayani ning tibuan
At waman e mibual king parang ning digma,
kabas ding SAF 44 ampon aliwa,
kabilang da ne ring bayani ning bansa,
king uli ning tune yang meging dakila!
