MILABAS na’ing kapat apulu nang aldo
ning mal kung esposa tauli nang panlako,
dapot anti ku pa waring ababatio
sumangid ning bigang king ere gagato
ita ning timan nang malumbe, mapusyo
a mangabaldugan e pa bisang mako
Pablasang balu nang mistula ing e ku
mie masaya kening ulilang bili ku
ngening ya ala ne’t e na pasibayu
ke’pang mikit agiang burian ming pareu,
nu’ne namu potang ing malam a Ginu
baywan Na’na ing bie peparam na kaku.
At talagang e pa ganap makasadia
ban lakuan na’na ku inyang aldo ita,
a nu’ anti niamung petad a inawa
ning metung a doktor a’yalang konsensya,
(ing misis kung e man mirate king kama)
king kelan nang malasakit pasyenti na!
Nung nu’ ing taung yan bilang ‘Nephrologists,’
balamu wari ing pamag-dialysis
nung direktang sabian king salitang English,
‘Easy Money’ ngara – inyasa’t ing praktis
ning doktor a iti e bala manganib
yang mate ing tau, ayamyam ning diaskis?
Manakitan ya sa’ lalu king bili na,
a e mu large scale a kasung Estafa
ing ken Macabebe ya makadimanda,
puera Branch 43, na ning RTC pa;
Nya ban malagua yang makagawang pera,
bali ala agyang makadisgrasya ya?
Nung inya makanyan ne niting apate
ing kakung asawa ning alang marine
doktor a mengangas idayalysis ne
ining maski e man pin rugu mirate?
At agyang bitasang ala yang siglawe
a maki-peligru ing antiting bage?
Lalu kanaku o karing kakung anak,
nu’ne pirapal na ing nasang marapat
para king misis kung dela ming pa-‘check up’
king ospital a nu’ ining Dr. Tayag,
a keyang attending physician ing sukat
pabaluan na pamu bayu kimut dapat?
Pero uli na pin ning pamangailangan
ning Nephrologists a maki-karaptanan
king bage mesabi, sukat mung agya mang
ala pang malino a pisabi mi n’yan,
obat kagulut ku rugu king ospital
intasang ing diablus kabud nia sinamal
At piragling linub ing kanakung misis
king operation room ban idayalysis?
At umpisa pamu, iti karing narses
nia kabud likuan at nanan de mang aplit
ausan n’yang mibaba ya BP y misis,
ing doktor, e ra ne akontak unabis.
Angga na king ini rugung asawa ku
a dela mi inyang bispera ning Pasku
(ken king Makabali ban ma-‘check up’ ustu,)
abeinte sais ning Disyembre, balamu
inatad mi’ya ban paten ing misis ku
king ospital a’yni ning e map a tau.
Maragul a bage sukat pakibatan
niti keng husgadu ngening delum ke yan,
a mabayat-bayat a kasung kriminal,
dimanda kia namang sibil ing taung yan
ban ing ‘medical malpractice’ nang pangawan,
mirinan justisya ampon kaparusan.
At ken ing metung a matibe sandata
ya’ytang ing apu kung magbante kanita
kang Lola na ya’mu ing pepagpirman na
king waiver, a nung nu’ dapat ing asawa,
o ing metung karing anak mi ing sana
sukat magpirma nung kailangan talaga
Ing marapalan a pamag-dialysis
king kakung esposang ditman alang malit,
ing ita ya na ing tauli ming pamikit,
o maging dalan ban ing bie na mapulid;
At ken itaya ku ing bie anggang binit
akamit ku ing fair and impartial justice!
