KALIBUGTA’NING tudtud ku
busal na nitang kabengyan
Dimdam kung ating kakalbit
kening lupa at king kanwan
Inyang busni ko ding mata
ikang kakung atangalan
Makatikdo king siping ku
at saka ka makatiman
Kitnan daka bat atyu ka…
mayli mu kung pekibatan
Tuki naka ngamung gingkas
karin tana manuknangan.
Nukarin yan ing kitang ku,
king lugal a kakung ikit
Ngamung sinabi kanaku
karin alang magkasakit
Alang mapagsamantala
inya alang malulupig
Ing tune pamikalugud
ya ing karin mayayakit
Saup-saup la ding tau
alang dusa alang sakit
Inya mibali’ku keti
uling buri dakang adakit.
Pekibat ku saguli mu,
wa sige tukyan danaka
Kinaul dakang matalik,
mahigpit ku talan keka,
King salu ku misukub ya
ing malagung kekang lupa
Anting pamagsamantala,
king uma dinilu daka
Saguli, ngamung sinabi
kagna’ning tinalakad ka,
Aku naman mebaldug ku
ketang pagkeran kung supa…
Nyang matna ku ikit dakang
darayung malale lakad
King kanakung pangabaldug
mabilis kung tinalakad,
Manaya ka ngaku keka
abutan kong kekang gamat
Dapot kening kagulutan
aramdam ku ing gulisak,
Inyang kaku lang balikdan
ding apu mu ampon anak
Ilang ikit kung tatangis
e la mingutngut ketang kyak.
Keka inyang malikid ku
yabut mula ding gamat mu
Mibili kung mikelangan
ding anak kinaul da’ku,
Sulung ika na ing muna
ngakung keka mengamanu
Ing kabilyan ding malakwan
kanaku pa mung yareglu,
Potang makasadya nala
nung lakwan tanong parehu
Asahan mung tukyan daka,
myabe katang pasibayu.
Pipepe mong kekang gamat
makatiman mamatras ka
Bagya-bagya kang lalaut,
ining lwa ku minagus na,
Angga inyang ing dalumdum,
selikut, inakmul naka
Inya e ra-naka ikit
dening makabatyo mata;
Kanita ku mipagising
ing sabla tagimpan pala
TAGIMPAN… yang ginising king
sugat ning pusung magdusa.
Diwa neng AMADO N. GIGANTE
ning Brgy. Anunas, Angeles City
