ING BALE tang’ matwa
luma ne’t menutap at maka-baube
Maybug neng milagmak
at bisang sumukung king gabun mipase.
Ding kasangkapa’nang
mangatwa tang gamit ‘tilu pakalele
Lamesa’t luklukan,
supang mengupas na, ing papag at lande,
Bukud mu ing katring
malwat mung pigkeran yang e ku linele.
At ding kasangkapan
a sadya mung gamit king sidwa’ning bale,
Buri kong’ akakit
king sadya rang lugal kening paglalawe,
Uling anti ra mong
paganaka kaku ing e ka pa mete.
Kanitang minunang
bayu kata pamung inaptas ning lugud
Ikata pa’ing adwang
keti manuknangan miyabe king panirug,
Ing bale tang iti
bayu yang talakad, ala ya pang matbud,
A anti mo ngening
bagya mu ing angin ta’ne dudugarug,
Kanita kekata,
iti yang Parayso, matibe nang bakud
Ning pisumpanan tang
angga king kutkutan dalan tang mabaldug,
Ding kekatang anak
keti la mu naman maybe tang teguyud,
Inanad king mayap
at tirung kilala king Dios a malugud.
Keting bale iti
karin ya melabung ing kekatang sapni,
Inya mal yang kakung
e ku buring lakwan, gulutan, iwaksi,
Uling ing napun tang
sari king kasampat a ngeni mepawi
Keting bale iting
luma na’t menutap, ken ngan mipasari,
Inya maybug ya mang
king gabun misaldak at mikakawani,
E kiarin alakwan
at king bengi-bengi keti ku mumuli,
Uling king bale yan
itang ligaya tang ngeni mengalasi
Ababakas ku mu
at kening panamdam anting mabye wari.
Ngeni, keting bale
a sadyang pugad na ning pisulung tula
Aku namung diling
muling mamanintun king mewalang sigla,
Meko na ka kaku,
pati ding anak tang teguyud ning kalma
King bye talasawa
mepilit deng likwan ing bale tang luma,
Inya itang napun
a mitmung pakamal, sagakgak at saya
At mipanagawian
mangatning lawiwi, gale at tumayla…
Paninintunan ku…
ngeni nukarin yan? Mipdang anting bula;
Inya keting bale
ngening akung dili lalto kung mulala.
Diwa neng FELIPE F. ANGELES
Ning Siyudad ning Angeles (P)
