(Kaugnay ng kampanya ni Pangulong Duterte laban sa talamak na illegal drug at iba pang masamang bisyo, nais ibahagi ng inyong abang-lingkod para sa inyong malugod na pagbabasa, ang isinulat ng kanyang panganay na anak hinggil sa bagay na naturan sa pagkakatong ito).
SA PELIKULA ay eksena madalas
huli kung dumating Alagad ng Batas;
Kadalasan sila’y ating namamalas
sa pinakadulo ng isang palabas.
Kahit pa si ‘Da King o si Lito Lapid
ang bida sa mga ‘Pinoy Action Movies;’
Karaniwang papel na r’yan nitong pulis
sa mga kalaban, sila ang dadakip.
At karaniwan ng kung kailan patapos
ang pelikula ay saka humahangos
Sa huling eksena papapel karampot
para hulihin ang masasamang loob.
Kaya lumalabas na katawa-tawa
itong kapulisan sa mata ng masa,
Subalit ngayon ay sila na ang bida
sa pagsupo nitong talamak na droga.
At sa pagtupad ng kanilang tungkulin
ang mga kritiko ay marami pa rin;
Bakit daw ang pusher di na lang hulihin
ng buhay at bakit kailangang patayin?
Ang mga pulis ay merong kasagutan
hinggil sa ganitong mga katanungan;
Sabi nga ni “BATO” minalas ang ilan,
partikular na yong mga nanlalaban.
Sa pulis din naman may nabibiktima
tulad ng sinapit ni captain Garcia;
Ito ay nabaril, nang arestuhin niya
ang dalawang tulak ng bawal na droga.
Kahit tinamaan ng punglo sa pantog
ang huwarang pulis gumanti ng putok;
Tinaya ang buhay, kasamang nalugmok
mga taong sa’ting lipunan ay salot.
Ang naturang pulis ay sinamang palad
sa tama ng bala na galing sa sumpak;
Kung di namatay ang mahusay na parak
mag-aakusa ang CHR ng “RUB OUT”
Ang kadakilaan ay tingnan din natin
sa mga pulis na tapat sa tungkulin;
Kung meron mang ilang may maling gawain
ay mas marami ang marapat purihin.
At bagaman mayrung anila’y tiwalî
na nasusuhulan minsan ng salapî,
ay mayrun din namang mga natatangî
na handang maglingkod, magpakabayanî.
Sila talaga ang masasabing bida
sa tunay na buhay at wala ng iba;
Tagapagtanggol ng ating demokrasya
at Saligang Batas nitong Republika.
Suporta ng masa ay lubhang kailangan
ng mga sundalo’t ating kapulisan;
Sila ang bantay ng mga mamamayan
laban sa salot at dumi ng lipunan…
Vhelle V. Garcia
August 25, 2016
U.A.E.
