Iti e ya kabud kapirasong tela
a pidait-dait banting mibubu ya
Ing tatangalan tang’ makule bandera
a replica na ning tehi ra kanita
karin king Hongkong ding atlung Filipina;
At nu’ iti ya ing meging simbulu na
ning lipi… at deting maslag a kule na
ila ring malino sasagisag keta,
karing kapuryan at tagle talindo ra
ding memalen at ning balen tamung sinta!
Ing asul, simbulu ne ning kapayapan,
katalarwan ampon dalise katutwan;
Kabang ing malutu tanda na tepangan
at ning malablab a lugud king balayan,
a e na apasbu ning patak ning uran;
Ing maputi, tanda niti kalinisan
at alang musing a maslag nang larawan;
Atlung batwin ila ring atlung kapulwan
at ding walung aslag ning aldo masilang
ilang simbulu ring walung lalawigan
A minunang diling tinikdo, mig-aklas
laban king Espanya ban milayang ganap;
A nung nu’ bistaman ding kekatang armas
talibung la’t pana, sumpak ampon tabak
ding ninunu tamu e la pepaysindak;
Lalam ning bandera a meging sagisag
ning balayan e re likwan makakasat
keng parang ning digma ing tatak nang maslag
ning pakamalan tang’ Indung Pilipinas
laban karing daywan a keti dinalpak!
Katungkulan tamu bilang Pilipinu
ing igalang taya ing Bandera tamu;
Nung mipaintagun keng arap kapitolyu,
munisipyu at/o gusaling publiku,
tatas de ing Bandera neng dadalan tamu;
Mamandal ta’ pamu ban munye respetu
kabang paytas ya’t e pa miladlad ustu;
Pablasang ing balang metung kekatamu
katungkulan na ing tupad at mamintu
karing saligan nang batas ning gubyernu.
Mangaintulid murin ing saludwan taya
uling sagisag nia naman ning ligaya
at tula ding sablang mepugtu inawa
busal na ning parang keng mapaling gyera,
laban karing liping masangil a pita.
Saludwan ya uling sandigan dia naman
king ikatimawa ning Indung Balayan
ding kapatad tamu a e re tengalan mang
sinlag ing dorado aldo king aslagan
a’yalang bitasang ulap a papampan!
Iti e mu bukud anting paganaka
kekatamu bilang memalen ning bansa,
nune sana pin neng tatas tayang sarya
iting simbulu ning masapsap dang tula,
ding bayaning mibwal king parang ning digma,
King iti sukat yang suywan kabang-kaba,
at busal ning salu karin idambana;
Kambe ning adwan tang lubus kang Bathala,
ing itamu ganap ta’nang mitimawa,
lalam ning makule Bandera ning Bansa!
