kang Lapid nung inia asna ku katula
keng pangasambut na, nu’ne itang bina
neng ambisyosu at sukat nang madala.
At nu’ e ne dapat makisamal-samal
tatagal pati na keng aliwang lugal,
kalupa ning kabud nia rugu tinagal
king Angeles, a nu’ e ken sukat tagal.
Uli ning ibat ne keng matas a puestu,
antimong ‘3-termer’ a governor tamu;
Bukud pa king meka-adua neng terminu
king matas a Kapulungan o Senado.
At nu’ mipuk la man keng matas a puestu,
ila ning anak nang y Mark, pero nanu
ing sukat paniglon ding kabalen tamu
inyang panahun da ren king Kaptiloyu?
Ing tata, e king yan pakisiran ke’yti,
meging aktibu ya king tungkulan niti?
Atlung terminu ing liklukan na bali,
pero linabas mung anting asuk iti!
Tinuki, ing anak, kalabas na ning siyam
a banuang panlukluk ning mapuring tatang,
dapot nanung sukat paniglon mu naman
nu’ne ing parating e ta’ya darasan?
Alus makanian ing ken king Kapitolyu
mayayakit kilub na ning paruminggu,
iniasa’t kabud y Among Ed Panlilio
ing linukluk, bigla mika-pamagbayu
Keng ‘quarry,’ a ngara ya kanung pikualtan
ding mapilan ata karing kasingkilan
(ding mitatang ‘actor’)… iti mepatpat nyang
y Among Ed yanang king timun tinalan.
At kanita pamu mitas ing koleksyun
keng ‘quarry’ nung inia ing posibleng rason,
nung bakit kanita pa mu meging milyon
Ing ‘daily income’ ken ‘it’s a big, big question’!
Meyakit king iti pasari marahil
ning ngara ding ‘checkers’ a mitoka karin
kilub ning aldo-aldo keng lulub a singil,
migit keng kapitna pamulsa rang tambing.
(Pero ngeni, oyan lubus nang mepatpat
ing ‘hokus-pokus ken – at nu’ pin madalas
sobra pa keng milyon, uli namu mekad
ning y ‘Nanay Baby’ e ya mapanekas).
At tune serbisyo karing kaprobinsya
ing buri nang ibie… a e ra kalupa
ding ‘corrupt’ a nu’ ing talagang pake ra
pansarili mu pin inia tatagal la.
Posible mu namang ding aliwa pin ken,
n’ya e la tatagal king sariling balen,
uli na mekad ning munang isipan den
ding kabalen mismu e ro ibotu ren?
E ku buring sabian ing deting mitata
sira la rekord den karing kabanda ra,
nu’ne ing marahil deti manginlag la
keng ikasambut den king mismung balen da?
Tanggapan ali ra ding mitatang Lapid
ing kasikatan da maluat nang mituklip;
At itang karisma a sadia rang bitbit,
maluat nang king angin mitange, mipaid.
Ing bie keting yatu makanian talaga,
lilipas ing banglu at eganagana;
At alang bukud a bakas lakuan na
ning tau nu’ne ing mayap at matsura!
