Makalulun na ing eleksyung miralan,
At ing bukud bakas malino melakuan
Katambak a sukal karing pipagbotuan;
Yan metung nang karaniwan a eksena
Keti kekatamu keng bie pulitika;
Nung nu’ kaibat ita’mu ken ing magdusa
Keng pamaglinis king likuan dang basura.
At ding pulitiku a dapat maglinis
King likuan dang kalat ding dipa’ning dyakis,
Pasalamat ka nung atin ka pang akit
Ban ing basurang yan akua rang iligpit.
E ko’ tutodusan… ding keraklan karen
Masipag la kabang atin lang buri ren,
Pablasang kaibat na pin ning alalan ken
Pasalamat ka nung akua mong’ alelen.
Ing metung at metung kareting tinagal
Mika-istorya nong’ king bie ra malakuan;
King meging makalma, dangalan at galal
Kabang king mesambut korona yang lakal.
Antiti kayumu at kapait misan
Ing maging bunga ning tagumpe’t kabiguan;
Inia nung ala kang matibe parasan,
Mekad isumpa mu ing bage makanian.
Insa’ mang alalan ating masasambut,
Pablasang nung misan malyap ing panyambut;
Inia nung kabilang ka kareng mesambut
O me-alang kalma e mu kalulungkut.
Lau pa’t uli na ning bage pikatsa
Inia ikua na kang king balen asira,
Iti mapaliaring bukas o makatadua,
Abawi mung miuman arapan ding malda.
Talagang makanian ing bie pulitiku,
Misan kipmuan pait, misan sari yumu;
(Ina’nak, siran ne ing ninong na mismu
king ba’nang akua ing pagnasan nang puestu.
Pati mikapatad, king panahun a iti,
Den e na la naman mipapanitindi;
Uli na ning balang metung pin kareti
Buri ra na yang lukluk alkalde o bisi.
O maski nanu pang klasing katungkulan
E baling malasak pamanang dangalan,
Ding pengaring meging buntuk ning balayan
Iniang deti bubut la pa at maintang.
Pulitika mu yan at iti e dapat
Maging dalan banting ing matibe aptas
Ning relasyun at/o pamikamaganak,
Muling alang kwenta at lubus malasak).
Antining makanian na ing kalakaran,
Keng bie pulitiku dapat tang’ ganakan
Ing itamurin ing lubus miapektuan
Kabud pepaytake tamu keng makanian.
Kalinguan ta’na ing nanu pa mang bage
A e tamu sukat ikapuri king bie;
Nu’ne anti na ning makanian na, abe
Ing usu, e ta’na king marok paytake.
Yan, e makakua keng kabud mu diritsu
Potang ila na ing mipuk, magserbisyu,
Uling nung misan mu kilub paruminggu,
Karin la lulub den nang’ apala tamu?
Ing kalulung balen ya rugung magdusa
At pihung mamusan krus king kabilian da:
Sana, den e ra la kalupa ring sadia
Ban e ta’ isumpa ing inalal tala!
