NANDING ABAK, kagising ku, biklat kula detang awang
Apansin ku maka’yliwa masaya ya ing lelangan
Ing sapul na nitang angin notas waring mararamdam
A babage king dalit ding ayup a mangundiman
Lilibad at luksu luksu king sanga ra ding tanaman
Ngening s’yam ya ing Oktubre atin la’tang pagmasusyan.
Kabang pagumasdan kula detang mangasayang denas
King babo da retang mangga lipat-lipat at teterak,
Masaya lang mamagdalit, matulang magdalipakpak
Kanita ku aganaka king istorya makasulat
Iting aldo ya ing aldo sentinaryung pangasapwak
Ning mayap a Angeleno, I RENATO “Ka Toks” TAYAG.
Ibat king kabayangna’na mababasa king istorya
Meyakit na keting balen itang tagle kayapa’na
Myaliwa lang klasing galal king panyulat ding ikwa na
Talasulat ya’t “editor” metung ya namang poeta
Inyang atin ya pang “law firm” ketang bayu mika gera
Meging Presidente Marcos yang abe nang opisina.
Dinatang ing gerang Hapon meyaus yang magsundalus
Karing sakang linaban yang mekipagkal, mekipamuk,
Karetang mamaping balas minarap yang alang takut
Ban kanita iting balen karing daywan e masakup;
Mibagsak ya ing Bataan abe de ring mesaluput
At linakad da king “ Death March” ding Hapon a alang tarus.
Meging metung yang sibilyan nyang mayari na ing gera
Dapot ing keyang kayapan pasibayung pepalkas na,
King pamamyalung nang tenis anting metung a atleta
Dela ne lagyu ing balen karin Melbourne, Australia
Bilang metung a sibilyan ketang kayang pamagobra
King bangku na ning PNB iti meging Direktor ya.
Ing ganaka at kayapan king pusu na manatili
Magmasabal ya king balen taung e makasarili
Kapakanan ding memalen yang isipa’nang parati
Nya king syudad pigkalub ne ing gabu’na ning Library
Detang dakal nang kabalen ilang makinabang ngeni
anti mu rin ding gagambul king Kultura ampon Arte.
Inyang kaybat kung abasa ing kayang bie king istorya
Itang lulam a makapal kanyang aldo tinakap ya
Nung inya pin meralumdum… pinapinandit kanita
Mipatak na keting gabun ing tinulung lwa ning banwa
Abe ta yang mamasayang bat king yatu ginulut ya
I RENATO “Ka Toks” TAYAG, ATIN YA PANG AKALUPA?
Neng Amado Gigante
Barangay Anunas
Angeles City, Pampanga
