Ing a dyes na ning Setyembre, nung lon me keng kalendaryu
Aldo yang kapyestan nang San Nicolas de Tolentino;
Antimurin ing petsang yan, bukud king mesabing Santu,
Atin pang maulang bage sukat pagmasusian tamu;
Yan e bilang Katoliku, nune bilang Fernandino,
Makapelam king meging bie na ning ilustradang tau
A sukat tang’ ibantiti keti Siyudad San Fernando
King aldo nang kebaitan, antimong anibersaryu.
Ngening pang-dinalan ampon apat a pulu’t metung nang
Banuang kebaitan niting bayani ning Indung Tibuan
A meging mapuring anak ning mal tamung lalawigan
King maulang pepilan na king mabie kasalesayan;
Bista’t metung yang babai ing sabla e na pikabyang
Gewa na ngan ing agyu na para king mal tang’ balayan
Banting makasuyung ganap at lubus nang agampanan
Ing nanu mang malyari nang asaup king Himagsikan.
Laban karing mapaniakup a keti migsamantala
King egana-ganang bage pati na pa ing upaya
A kekatamu simsam da ding masangil a Kastila
Inyang ilang gugubyernu king sarili tamung bansa;
Makanyan lang migkapilit migkalag king tanikala
Ning pangayalipan ding menimunang meki-digma
Ban keta ing katimawan ayatbus dang pawas, daya
Karing gamat da ring daywan a kekata migpasasa.
At nu’ agyang nung wari sa’ kanyang kristal a balbalin
Peligroso keng bili na ing munta keta at karin,
Pauli ning babai yang kasing selan ning salamin
A malyaring mipalamang keng gamat da ring salarin,
Iti e na pikanlapan nune bagkus sindu na rin
Ing imbut nang makasuyu at ayampang antimurin
Keng kimutan ing agyu na at ken partikular na pin,
Ing lingapan la at uluan ding salunan at mebaril.
Ing pekamatinding diling kapagsubukan a miras
King tepangan a bitbit na inyang mabnu lang mikaras
Di Antonio Luna at y Maskardo, king e metupad
A utos na nining Luna – a meging sangkan at sukat
Ning malaguang pangasambut ding magbante karin Bagbag
Laban king puersang Kastila, a karelang pipagkasias;
Dapot kapamilatan nang Nicolasa – yan meyampat
Inyang ikua nang apasbu ing mua rang mikakalabkab!
At ikua nang asalese ing karelang pisunggalit
King masampat a paralan bista’t asna king kasakit;
Makanyan ya katatag y Donya Nicolasa Dayrit
A ngeni pagmasusian ta’ ing Aldo nang panga-bait,
Bukud karing aliwa pang kabalen tang’ masalpitik,
A sukat kilalanan king kabayanian dang pepakit;
Uling karapat-dapat mu at karela mangaintulid
Ing papuri at parangal a e sukat mipagkait;
Inya naman, oren balang Fernandino’t Fernandina
A teya ra pati bugtung dang bie uli ning balen da,
Indat miras ing aldo ning masayang kumpleanyu ra
O aldo rang kematayan dirinan nang importansya
Niting siyudad, lalam na ning tapat nang pamanimuna,
Mayor Edwin D. Santiago kambe da ring aliwa pa;
Ban ing meging papil deti king bilungan ning istorya
Mirakayan masampat a mabie pamipaulaga.
King Heroes Park niting Siyudad, at nu’ metung ya y Dayrit
Karing maki-monumentu at nung nu’ la mayayakit
Di Hilario, Abad Santos, Ninoy Aquino, Gat Andres,
At nu’ kilub ning Heroes Hall ‘tin ya namang mayayakit
A larawan ing bayaning Fernandinang masalpitik,
Kadane na ning busto nang Apung Dadong, ken meyakit
King y Donya Nicolasa tune ya ping mangintulid
Mirinan karampatan a galal a sukat isabit!
