Ang eleksyon ay di matutong magtipid
Sa kung anu-anong klase riyan ng gimik
Para lang mapansin ng ‘general public’
Itong ngayon pa lang ay gumagasta na
Ng milyones tiyak gayong matagal pa
Bago maghalalan yan ay sobra-sobra
Na sa sino pa man para imimorya
Ang pangalan nila’t lubos matandaan
Kung ano ang bitbit nilang katangian
Para sila ang siyang ating ihahalal
Comes year 2016, di na mabili yan
Bagkus sa ‘wise voters’ di okey ang dating
Partikular na riyan sa napakadaling
Magsawa agad sa ‘infomercial’ manding
Paulit-ulit na naririnig natin.
At kung saan suma total sa puntong yan
Bago pa sumapit ang ‘campaign period’ diyan
Posibleng higit pa sa sasahurin niyan
Sakali’t manalo ubos na diyan pa lang
Kaya ano pa ang maasahan nating
Uring serbisyo ang ibibigay sa ‘tin
Kung bago ang lahat walang uunahin
Kundi makabawi sa naging gastusin?
At saan posibleng ang ganyan humantong
Kundi sa talamak at grabeng ‘corruption?’
Sanhi lamang nitong di man ay millions
Na ang sinusunog nila sa eleksyon!
At ang puno’t dulo syempre ay nakawan
Sa kabang-bayan ng ating Inangbayan
Ang mamayani sa lahat ng sangay
Ng ating gobyerno ngayon at kailanman.
Sapagkat kung laging ganyan ang sistema
Na umiiral sa ating Republika,
Na pinamugaran ng mga buwitre’t linta,
Kailan pa ang Inangbayan giginhawa?
Maliban na lang kung sa dinami-dami
Nitong nagsasabi na handang magsilbi
Para sa bayan at/o nakararami
Ay sadyang matapat at maging mapuri.
Pagkat mabibilang sa ating daliri
Ang tunay at sadyang ginto ang kauri
Sa panahong itong mahirap pumili
Ng taong mabuti ang pag-uugali.
Partikular na riyan sa nagkukumahog
Kumandidato at tuluyang pasakop
Sa larangang pakapalan lang ng apog
Ang puhunan para marating ang rurok
Na pinapangarap marating ninumang
Ay adhikain ay pangsarili lamang,
Maliban na lang sa iba, na ang tunay
Na layunin nila’y serbisyong pambayan
At di magpayaman para sa sarili,
Na kagaya riyan ng mas nakararami;
Kundi ng mahusay at matapat pati
Na serbisyong dapat nilang ipagsilbi.
Malayu-layo pa ang ‘Year 2016’
Para mangampanya kaya mas mabuting
Maglubay muna sa kanilang gastusin
Sa ‘infomercial’ na nakasasawa rin!
