Ing taung tiktak king kasyas a katawan
Menasa king bie na lupad ya kabilyan,
Pablasang ing obra kasaman ding dakal
At e ra kapad ing binang mapapagal;
Inya naman imbes atin yang itun yan,
Mas madalas itang ala yang tatamban.
At makananu yang manyese pamilya
Ing anti kaniti nung makiasawa ya,
Ngening keni mu mang sariling asbuk na
Ala’ng ike agyang nasi mung marimla?
Buryan ne wari ning metung a dalaga
Ing lalaking pataktakan keng tamad na?
Mau niang talagang asawa’ing babai
Nung paybulag ya keng makanyan a klasi?
Uling kabud ya ping ayasawa na’yti
Alang kapilisyan pihu yang sumisi,
Pablasang ya pa ing asahan nang pilmi
Ning keyang asawang mamilang mung posti!
Pero, misan ating bage pagmulalan
A malyaring e ta’ lubus paniwalan,
Ya’ytang at nung bakit ding aliwa naman
Milalabas la king karelang kabiayan;
At akakwa ra pang daramag keng sugal
King agyang den ala lang kapanintunan?
Ing metung pang sisting e katanggap-tanggap
Inggil karing taung tiktak keng katamad,
Ya’ytang at nung bakit pati keng pamiblas
Daig de misan ing ating pirming kalap,
Samantalang iti nung e ya manasdap
Nu’na mo asali ultimo mang medyas?
Pagmumulalan pin birtud ding aliwa
A nung makananu reting agagawa,
Itang ala no’mang panintun bitasa,
Mikakapera la’t magbisyung mialiwa,
Kabang itang alus mipawas nang daya,
Manalbe mang sine e na’rapat kusa.
Pero anti na pin niting kalidad da
Ding masyas a gulut allergic keng obra,
Deti agyang ala lang laman a bulsa
Balamu nung ninu ren potang masta la,
Pablasang sane no’ king bie rang antita
At pata na mekad keng pintas at puna.
At uli na pin ning likas na kareti
Itang alang pamag-sikap king sarili,
Sapat na karen ing penugalyan deti
Ya’sang milalabas matula no’ kasi;
E ran a isipan itang bandang tauli,
King ing pamagsikap maulgang dili.
Waman kasi tutu, kasebyan makatwa
A nung milabas ya ngara ing garosa,
Midalan ya naman kanu ing gareta,
Pero e ta’ lubus manalig kanita;
At yan king sarili e dapat maging giya,
Uling ing temaran kanser ing kabas na.
Bakit e ta’ wari agawang mibangun,
Itang agyang e mu binang pakaranun,
Banting igawang la gamat mung mengaklung
At ilako pata tundun mu keng ulun?
Oneng ali agyang misan mu manuldul,
E ra ka abaklas keng dase mung laun.
Inya ing kasebyan a ngara pin kabud
Ding makatuwang tanak, king kabiasnan lusuk,
A ngara pin keta: “Ing masyas a gulut,
Potang mibangun ya – ya mang taklang manuk,
Kilub ning mula na ala neng apulut” –
Iti, katutwan a e ta’ asalikut!
