Kung ang naging paksa ng Drug Summit sa Clark
na ginanap nitong buwang nakalipas,
nina “Nanay Baby” at General Cacdac
at iba pang mga LGU Officials
Ay lubos nabigyan ng kinakailangang
pagtalima riyan ng kinauukulan,
lalo pa’t ang mga bagay na tinuran
sa naturang ‘summit,’ dati na ang ilan
Partikular itong hinggil kung papano
ang tamang pagtanggap at pag-asikaso
sa mga dayo lang at di taga rito,
na gustong umupa ng bahay o puesto;
Kung saan ang dapat muna nating gawin,
ipagpaalam sa ‘barangay chair’ natin;
Alamin ang pagka-tao’t saan galing
at hingan pati ng sertipikasyon din
At kung negosyante, at yan ay uupa
ng ‘warehouse’ o kaya gagawing pabrika,
Tingnang maigi kung anong produkto niya
para makatiyak na yan ay di droga
At paminsan-minsan bisitahin ito
upang makita ang kanilang negosyo;
(Nang di matulad sa isang Inhinyero,
na residente ng San Fernando mismo
Na ang nangupahan sa kanyang bodega
sa Greenville ay mga ‘shabu makers’ pala;
Na ni hindi man lang yata nasilip niya
kung ano ang tunay na negosyo nila).
Kaya hayan, buking ang mga damuho
sa ‘raid’ ng PDEA’t kapulisan dito,
Kung saan ang laman ng bodega nito
ay di lamang pala kilo-kilong shabu
Kundi sako-sako’t nagkaka-halaga
Ng apat na bilyong piso o sobra pa,
(Na katumbas na ng nasamsam na droga
nitong ‘year 2013’ ng PDEA).
Nakapagtatakang di nabisto man lang
ng ‘barangay chair’ at mga kagawad niyan
ang paglabas-masok nitong mga suwapang
na tatlong Chino sa ‘Village’ na naturan
Gayong ang distansya ng lugar na ito
ay mahigit lang yata sa isang kilometro
mula sa city hall… kaya papaano
nakapag-operate ang mga damuho?
Maliban na lang sa may mga kasabuwat
sila sa illegal nilang aktibidad,
Na kahit pa man yan ay gawin ng lantad
ay di sisitain ano pa mang oras.
Pero kahit naman di mataong lugar
at kakaunti lamang ang nakatira riyan,
Ni isa man lang ba ay di napansin niyan
ang medyo kakaibang mga pagkilos diyan?
Matatandaang sa Greenville din umupa
ng apartment noon itong ‘notorious’ na
Carjackers na sina Dominguez, at saka
iba pang kasosyong halang ang bituka.
Di na ba nagtanda itong otoridad
na dapat umaksyon at gawin ang sukat
ipairal para sa ‘ting komunidad
upang malayo sa ganyang aktibidad?
Sa napakasimpleng pamamaraan lang
at alinsunod sa dapat ipairal,
Partikular na riyan ng mga Kapitan,
na sila talaga itong nasa ‘frontline’
Para mangalaga sa barangay nila
at ibang bagay na marapat tingnan pa,
Kasama na riyan ang maging tapat tuwina
sa tungkuling naka-atang sa kanila!
